Handholding-ah Loan la tur mi 646 leh CM Special Package atan mi 2257 thlang tawh

Mizoram Sawrkar flagship scheme Bana Kaih (Handholding) hnuaiah Loan la tur mi 646 leh CM Special Package dawng tur mi 2257 thlanchhuah an ni tawh a, CM Special Package dawng tura thlan te hnenah hian July 2025 thla chhung hian tanpuina semchhuah vek hman tum a ni.

Mizoram Sawrkar Flagship Scheme, Bana Kaih (Handholding) chungchangah sawrkar hotute tan nimin khan Aizawl-a Planning & Programme Implementation Department Conference Hall-ah Leadership Sensitization Workshop neih a ni a, he hunah hian Mizoram State Policy Coordination Committee (MSPCC) Secretary Lalmalsawma Pachuau chuan Handholding Scheme hnuaia hmalakna awm tawh te report pe in, Bana Kaih Scheme hnuaia Chief Minister Special Package dawng tur mi 2257 thlanchhuah an nih tawh thu a sawi a, heng bakah hian Loan la tur mi 646 thlanchhuah a nih tawh thu a sawi bawk a. Bana Kaih Scheme hnuaia CM Special Package dawng tura thlan te hnenah hian tun thla, July 2025 chhung hian sem zawh vek tum a ni a. Loan component pawh dilna hawng leh thuai tura ruahman a nih thu tarlan a ni bawk.

Leadership Sensitization Workshop hi MSPCC Vice Chairman Dr. KC Lalmalsawmzauva chuan kaihruaiin MSPCC Member LP. Lalchangkima chuan presentation pe in sawihona neih chhunzawm a ni a, he Scheme hnuaia Loan Component chungchangah, Bana Kaih Scheme hnuaia loan hrang hrang te chu Loan Scheme awmsa te ni mah se dahkham tur an neih loh avang te, a pung rulh an huphurh thin avangte in mi tam tak chuan an lak ngam loh phah thin thu sawi a ni a, Bana Kaih Scheme hmang hian Sawrkar chuan loan pung rulh ngai lova dahkham tur pawh tum sakin a mamawh tute tan loan a lak sak dawn a nih thu tarlan a ni.

He programme-ah hian chak zawka he Scheme kalpui zel a nih theih nana hmalak dan tur hrang hrang te, Scheme chungchang inhrilh-hriatna kalpui dan leh thu pawimawh dangte sawiho a ni bawk. Programme hi MSPCC Member Zohmingthanga chuan lawmthu sawiin hun a khar a ni.

Bana Kaih (Handholding) chungchang zirhona hunah hian Mizoram sawrkar-a Minister leh MLA te bakah Corporator te telin an ngaih pawimawh hrang hrangte an sawi a ni.