Chief Minister hovin Higher & Technical Education hnuaia hmalakna hrang hrang thlirho a ni

Higher & Technical Education hmalakna hrang hrang thlirin nimin khan Chief Minister Lalduhoma hovin sawrkar mi pawimawhte an thukhawm a, he hunah hian zirna In sang te dinhmun hrang hrang ngaihtuah a nih bakah Scholarship chungchang te pawh sawiho a ni bawk.

Chief Minister Lalduhoma kaihhruaia a Pisa-a thutkhawm ah hian DP&AR Minister K. Sapdanga leh Higher & Technical Education Minister Dr. Vanlalthlana bakah Official pawimawhte telin he hunah hian NIT Mizoram Campus chungchang tarlan a ni a. Kum 2009-ah Lengpui-ah Campus sak bultan niin, kum 2017-ah Forest Clearance nei lova hnathawh avangin hna hi tihtawp a ni a. Kum 2021-ah Forest Clearance dil (Application of diversion of reserve forest) niin kum 2023-ah Mizoram sawrkar chu cheng vbc. 20 chuang chawi tura tih a ni a. Chief Minister Lalduhoma hmalak hnuah Forest Advisory Committee chuan cheng vbc. 1.4 chawi turin a rawn ti ta a ni. Pawisa chawi tur hi deposit vek tawh a niin hnathawh chhunzawm thuai beisei a nih thu tarlan a ni.

Mizoram State University chungchang pawh he hunah hian tarlan niin, New Education Policy, 2020 chuan kum 2036 hmaa State University nei turin State tin te a phut avangin neih ngei a ngai dawn a. Aizawl-a College pahnih pathumte zawmkhawmin School pali vel hawnga Post Graduate zirna bultan tum a ni a. Mizoram State University (MSU) hmunpui atan hian tuna Geology & Mining ram, Luangmual chu ruahman a ni a, Geology & Mining hi MINECO-ah hmunhma pek an ni thung. MSU hmunhma thar hi peihfel a nih hma chu Govt. Aizawl College building, Sikulpuikawn chu Administrative Building atana hman lai lawk tha an ti a, a bul lo tan a, a tul apiang lo thawktu turte ruat thuai a ngai dawn nia sawi a ni.

Hei bakah hian Mizoram Engineer College chungchang pawh nimin-a thutkhawm ah hian sawi niin Engineering College hi nakum Academic Year atanga kalpui tan theih tumin chak taka hmalak mek a ni. A hmunhmate thawmthat nan Mizoram sawrkar chuan tunhnai khan cheng nuai 2541.19 a pe a. Hna thawk tan thuai tura beisei niin he College-ah hian Civil, Mechanical, Electrical leh Computer Science & Engineering Course-ah te Seat 30 theuh neia bultan tum a ni a. Mizoram Polytechnic Lunglei-in harsatna a tawh mek chungchang pawh sawihom ni bawkin Supreme Court hearing a awm dawn hnaih thu leh hemi atan hian tha taka inbuatsaih a nih thu tarlan a ni bawk.

Mizoram Scholarship Board hmalakna hrang hrang pawh he thutkhawm ah hian sawiho nghal a ni a, he huna tarlan a nih danin Post Matric ST Scholarship chu kum 2023-24 ah dilna 31,652 dawn a ni a, a hmu turin mi 27652 thlan niin sum pekchhuah zat chu cheng nuai 3497.69 a ni a, la pek loh mi 4000 te chu Additional Fund hmuh a nih hunah pek an ni anga. Kum 2024-25 ah dilna 28,471 dawn a ni bawk.

Pre Matric Scholarship chu kum 2023-24 ah zirlai 8911 in dilin heng atang hian a dawng turin mi 8148 thlan an ni a. Tunah hian cheng nuai 313.64 sem tawh a ni a, a la dawng lo mi 763 te chu Additional Fund hmuh a nih hunah pek an ni anga. Kum 2024-25 ah zirlai 8807 in an dil mek a ni.

State sawrkarin Scholarship a siam bikah, Post Matric Scholarship chu mi 58 hnenah cheng nuai 3.77, Mizoram Research Fellow mi 7 hnenah Rs. 64,000, RIMC tanpuina mi 4 hnenah cheng nuai 2.77 leh Sainik School Chhing-chhip-a naupang 233 tan cheng nuai 280.42 pek a ni.

Mizoram-ah hian H&TE Department enkawl UGC Approved College 23 an awm mek a, Grade A+ nei pakhat awmin Grade A nei College pathum leh Grade B++ nei pahnih an awm a ni.