MNF in Mizo Hnam Run-ah Chhung Inkhawm an nei

MNF Party chuan nimin khan Aizawl-ah Mizo Hnam Run-ah chhung inkhawm neiin Sr. Vice President Dr. R. Lalthangliana chuan Mizoram GST dinhmun tarlangin, “Kan hun lai khan GST lakluh a pung nasa a, tuna GST tlahniam ta em em hi Restricted Tender leh Departmental-a Contract hna inpek a nasat vang pawh a ni thei,” a ti a. “Kum 2017-18, GST dan hmanga chhiah lak anih atanga a vawi khat nan kum 2024-25 ah Mizoram GST lakkhawm a tlahniam duai a, Covid hunlai pawha la thleng ngai lo a ni. Kum tharah pawh ziaawm lam aiin a hniam zawngin kan kal chhunzawm zel,” tiin “Tualchhungah pawisa a vang a, sumdawng ten inhralh harsa an ti deuh vek. A chhan ni ta ber chu budget figure atanga enin ZPM sawrkar hi Finance enkawlah a hlawhchham chiang hle a ni,” a ti bawk.