MYC kaltlangin British Army-ah Mizote an lut

Mizoram Youth Commission (MYC) Chairman Malsawmzuala Ralte chuan MYC kaltlanga British Army-a tang duh, Mizo tlangval 247 dilna thehlut atangin mi panga koh zingah mi pathumin British Army an zawm fel tawh thu a sawi.

MYC Chairman Malsawmzuala Ralte chuan British Army-a tan dil Mizo tlangvalte chuan kohna an hmuh belh zel an beisei thu a sawi a, British Army training hun chhung chu kar 8 vel a nih tlangpui thu leh training lai atangin thla tin India pawisa-a cheng nuai 2 an hlawh thin thu a sawi a. Sipai an zawm hnu reilote-ah thla tin India pawisa-a cheng nuai 3 an hlawh vat thu sawiin, Mizo thalai hrisel tha, zai pui la tawk lemlo tan thil huphurh awm a nih lem loh thu leh British Army-a kum bithliah chu kum 18 atanga kum 37 inkar a nih thute, thiamna lamah pawl 12 pass an pawm thu leh Mizo thalai dil duhte tan ram danga zin theihna passport neih a ngaih thu te a sawi bawk.

MYC Chairman chuan Mizo thalaite tana hma an lakna huang zau zawka kalpui a nih theih na’n Corporate Social Responsibility (CSR) haichhuah kawngah pawh theihtawp an chhuah thu leh kum khat leh a chanve chhungin CSR atang hian cheng nuai 63 vel an hailuh tawh thu a sawi a. MYC-in Hotel Management zirna a kalpui chu Honda company te’n a tul ang zawng zawng, Zirtirtu hlawh thlenga an tumsak thu sawiin, nikuma zirlai Batch nga an neih leh kumin a zirlai Batch thum an neih zirna senso belhkhawm cheng nuai 14 vel chu Honda Company hian an tumsak vek thu a sawi bawk.