Keitum leh Khawlailung inkara Tuichang Lei dawh PWD leh YMA hruaitu ten a hmunah an tlawh

Keitum leh Khawlailung inkara Tuichang Lei dawh hna kum 2019 vel atanga tan tawh chu tunkar chho hian Lei chhuat RCC hmanga chhun tumin ruahmanna siam mek a ni a, Lei chhut hi chhun mai tura ruahman ni mah se mipuite hman theih tura peih theih hun tur erawh hriat theih ala ni lo.

Tuichangral khaw hrang hrangte chak lakna kawng pawimawh tak, Tuichang Lei dawh hna thawh mek hi Inrinni khan Serchhip-a PWD hotute leh Serchhip Sub-Hqrs. YMA leh Tuichangral South Group YMA hruaitute chuan a hmunah tlawhin hnathawh mek te hi an enfiah a, he Lei dawh hna hi a zawh hun tura ruahman ah zawh hman a nih loh avangin PWD chuan hnathawktu M/S Sadguru Engineers & Allied Services Pvt. Ltd. Guwahati te chu insawifiah tura an lo tih tawh hnuah June, 2022 chhunga an hna te hi chhunzawm tura tih an ni a, hemi ang hian hnathawktute chuan tunhnai khan Lei chhuat-a chhun tur Cement leh Balu bakah hnathawhna tur hmanrua te chu an chhekkhawl tawh a, tunkar chho hian Lei Chhuat (RCC) chhun hna hi tan tura ruahman niin RCC hi Lei laihawlah inches 10 vela chhah leh a sir tawn ve ve-ah Inches 8-a chhun tur a ni tih PWD hotute chuan an sawi a ni. Lei chhuat chhun hna hi zawhfel ni mah se hman nghal mai theih a ni dawn lo tih PWD hotute chuan sawiin, Lei-a lirthei kalkaina tur siamna atan hna tam tak a la awm thu leh sawrkar-ah estimate siama sum an dil mek thu an sawi bawk a ni.

He hunah hian YMA hruaitute chuan he Lei dawh hna hi a rang thei ang bera zawhfel an duh thu sawi nawn lehin, Lei chhuat chhun zawh hnuah pawh hman nghal thuai a nih theih nana hmalak thuai tul an tih thu an sawi bawk a ni.

Keitum leh Khawlailung inkar-a Tuichang Lei hi kum 2016 December thla atang khan dawh niin a tirah chuan RCC Lei, a lai-a ban ding-a dawh tur niin kum 2018-ah zawh hman tur a ni a, amaherawh chu Lei dawh tura a laia ban ding tur chu tih fuh theih a nih tak loh avangin Built-Up Steel Girder Bridge (Single Span) in dawh tura tih a ni leh ta zawk a, November, 2019 khan hna hi tan leh niin March 31, 2020-ah dawh zo tura tih ni mah se tun thlengin zawh ala ni ta chuang lo a. He Lei hi Metric ton 200 chuang zo tura duan niin Metre 68-a sei leh Metre 7.50-a zau tur anih bakah Leichhuat Concrete Cement chungah hian Wearing Coat siam leh a ni bawk ang.