Tourist Lodge-ah duhsak bik neih a theihloh tih tarlang

Tourism Department chuan Mizoram-a Tourist Lodge te chu khualzin te leh zin mite tan a buatsaih a ni tih sawiin, sawrkar hnathawkte duhsak bik theih an nih loh thu an sawi.

Hemi chungchangah hian July 20, 2022 khan Principal Secretary, Manisha Saxena, Tourism Department chuan Office Memorandum tichhuakin, sawrkar hnathawk te Tourist Lodge a an thlenin duhsak bika lo dawnsawn beiseina a awm thin tih hriat a nih thu leh chu chuan a hmun enkawltu, hnathawkte dinhmun laklawh ah a siam thin thu a tarlang a. Sawrkar hnathawk thenkhat te'n an mikhualte tan Room lo Book/block turin hnathawkte an hriattir thin tih hriat a nih thute, Tourism Department in Room Booked nan Online System a hman vek tawh avangin hei hian buaina lian zawk a thlen fo thu te a tarlang bawk.

Tourist Lodge te chu khualzin te leh zin mite tan a buatsaih a ni tih tarlang bawkin, sawrkar facility hrang hrang, Circuit House, Mizoram House, State Guest House etc. te anga ngaih tur a ni lo tih an tarlang a. Tourism Department in www.mizoramtourism.com hmanga online booking an kalpui chuan sawrkar hnathawk te pawh a huam vek tih a tarlang bawk.