Independence Day Football khel zel

SDFA hnuaia 1st Division te chuan nimin khan Independence Day Football Tournament khel tanin naktuk-ah an match hnihna an khel leh bawk ang.

Serchhip Sports Complex-a Serchhip District Football Association (SDFA) buatsaih Independence Day Football, Division Screening Tournament ni bawk khelh mekah hian nimin khan 1st Division Club 8 ten an match hmasa ber khelin inkhel hmasa berah FC Serchhip Kawnpui ten 4-2 in Bungpui FC Hriangtlang an hneh a, FC Serchhip Kawnpui tan John Lalmuanpuia chuan goal hnih khungin Lalramhluna leh Rodinsanga ten goal khat ve ve an khung a, Bungpui FC tan Lalromawia leh Francis Zohmingthanga te chuan goal khat ve ve an khung bawk a ni.

Nimin a inkhel vawi hnihna ah New Serchhip FC in Chanmari FC chu 2-1 in an hneh hram a, Chanmari FC hian Felix Lalruatsanga goal thun hmanga hma hruai hmasa in Lallawmkima chuan New Serchhip FC si phurh hi a sut a, hun tawp dawn hnaiah H. Vanlalremruata chuan Penalty atangin New Serchhip FC chakna goal hi a khung zui a ni.

Inkhel vawi thumna ah Vengchung FC leh Chhekhnai FC te goal khat ve ve inpe in an inhnehtawk a, Vengchung FC hian Lawmna-sangzuala goal khung hmanga hma hruaiin Lalnunmawia chuan Chhekhnai FC tan an si phurh sutna goal a khung ve leh bawk a ni.

Nimin a inkhel hnuhnung berah Hmar Veng FC in AWC FC chu 2-1 in an hneh ve bawk a, AWC FC hian David Lalbiakzara goal khung hmangin hma hruai hmasa mah se Hmar Veng FC tan Malsawmkima leh Lalhunthara te chuan goal khung ve lehin 2-1 in hnehna an chang ta zawk a ni.

Vawiin hian 2nd Division ten an Group match tum hnihna an khel tan dawn a, zing dar 9:30-ah inkhel tanin Group B atangin Hmar Veng FC (White) leh FC Serchhip Kawnpui inkhelin Dress Up FC leh Kawn Veng FC n inhmachhawn leh anga, Group A atangin Bungtlang Bazar FC leh Vengchung FC; Keitum-I leh Leisekawt FC te inkhel in inkhel hnuhnung berah Group C atangin Hmar Veng FC (Red) leh Fied Veng FC te an inhmachhawn bawk ang.