Freedom Fighter leh Padma Awardee chawimawina hlan

India ram zalenna kum 75 na (Azadi Ka Amrit Mahotsav) lawmna kal zelah nimin khan India zalenna sualtu, Freedom Fighter Darthawma Renthlei (L) leh RK.Lalhluna, Padma Shri Awardee te chawimawina hlan an ni.

Lunglei DRDA Project Director M.Misael-a hova a Office Chamber-a he hun hmanna ah hian M. Misael chuan India ram zalenna lawmna (Azadi Ka Amrit Mahotsav) kal zelah India ram a District 75 thlan-chhuah ah Lunglei an lang ve chu Freedom Fighter leh Padma Shri Awardee te vang anih thu a sawi a, Lunglei in hetiang mi chhuanawm an nei chu lawmawm a tih thu a sawi bawk.

Darthawma Renthei (L) hi kum 1920 khan Pukpui khuaah a piang a, November ni 27, 1940-ah British Army zawmin kum 1941 khan Malaysia a thawn zingah a tel a, kum 1942 khan Japan leh British sipaite chu Prisoner of War ah man niin Darthawma Renthlei (L) pawh hi a tel a ni. Jail atanga a chhuah hnuin Indian National Army a zawm a, man leh niin kum 1946 ah chhuah zalen a ni. India ramin zalenna a hmuh hnuah Freedom Fighter of India-ah pawm a ni a. India zalenna sualtute tana siam Tamrapatra Award chu August ni 15, 1973 khan hlan a ni. Darthawma Renthlei (L) hi Lunglei Chanmari ah a nupui fanau te nen chengin July ni 21, 2019 khan a boral a ni.

RK.Lalhluna, Padma Shri Awardee chuan he huna chawimawi a nihna chu Freedom Fighter te zar liau liau a nih thu a sawi a. India ram zalenna lawmna pual a chawimawina a dawng chu thinlung takin a lawmawm a tih thu a sawi bawk. RK.Lalhluna hi Mizo te tan a thu leh hla lam a thawh hlawk tak a ni a, kum 1991 khan Padma Shri Award hi dawngin tunah hian kum 84 mi niin Lunglawn Lunglei ah a khawsa mek a ni.

Comments

Popular News (Last 30 Days)

LPG man bithliah thar