COVID-19 enkawllai mi 709 la awm mek

Nimin thleng khan Mizoram-ah COVID-19 hri kai hmuhchhuah la pung zelin nimin tlai thleng khan hri kai enkawllai pawh 709 an la awm.

Niminpiah khan Mizoram-ah Sample 594 enfiah leh niin heng atang hian COVID-19 hri kai mi 138 hmuh leh an ni a, Sample enfiah atanga chhutin za zela 23.23 te chuan hri hi an kai a ni. Niminpiah a heng hri kai hmuhchhuah 138 zinga 137 te hi Rapid Antigen Test hmanga Sample enfiah 590 atanga hmuh an ni a, Aizawl District-ah 94, Lunglei District-ah 15, Kolasib leh Serchhip District-ah mi 10 ve ve, Lawngtlai leh Saitual District-ah mi 3 ve ve, Hnahthial District-ah mi pahnih leh Champhai District-ah mi pakhat te an ni.

Heng bakah hian niminpiah khan Lunglei-a TrueNat Laboratory-ah Sample enfiah pakhat awmin hri a kai bawk a, ZMC-a RT-PCR Laboratory-ah Sample enfiah pathum awmin hri an kai lo thung a ni.

Nimin khan Mizoram District 8 atangin COVID-19 hri kai enkawl dam mi 170 an awm belh ve leh thung a, heti hian nimin tlai dar 5:00 thleng khan Mizoram-a COVID-19 hri kai hmuhchhuah tawh chu 2,31,204 niin an zinga 2,29,788 te chu enkawl dam an ni tawh a, hri kai hmuhchhuah atanga chhutin za zela 99.40 te chu enkawl dam ni tawhin hri kai enkawllai mi 709 an la awm a ni. Nizan hmasa khan Aizawl Dawrpui Vengthar mi pakhat chu COVID-19 vangin ZMC-ah a boral ve leh a, tun thla ni 11-a hri kai hmuhchhuah niin heti hian nimin thleng khan Mizoram-a COVID-19 hri kai zingah mi 707 an boral ta a ni.