Hri kai enkawllai 58 awm

Serchhip District-ah COVID-19 hri kai en-kawllai pung leh hretin nimin tlai thlengin hri kai enkawllai mi 58 an awm.

Nimin khan Serchhip District-ah COVID-19 hri kai mi 7 hmuh belh leh an ni a, heng hri kai hmuhchhuah zinga mi 4 te hi Thenzawl khua niin pahnih te hi New Ser-chhip Khawtetlang an nih bakah midang pakhat hi Serchhip Leisang Veng a ni. Nimin khan Ser-chhip District-ah hian COVID-19 hri kai enkawl dam mi 5 an awm ve leh bawk a, an zinga pathum hi East Lungdar niin Serchhip leh Thenzawl-ah mi pakhat ve ve enkawl dam an ni.

Heti hian nimin tlai thleng khan Serchhip District-a COVID-19 hri kai hmuhchhuah tawh chu 14,215 niin an zinga 14,122 chu enkawl dam an ni tawh a, hri kai hmuhchhuah atanga chhutin za zela 99.34 te chu enkawl dam an ni tawh a, hri kai enkawllai mi 58 la awmin hri kai zingah mi 35 an boral tawh bawk a ni.

Tun dinhmunah Serchhip District khaw 5-ah COVID-19 hri kai enkawllai an la awm a, Thenzawl-ah hri kai enkawllai tam berin mi 21 enkawl an la ni a, East Lungdar-ah 13 enkawl an la nih bakah Lungpho-ah 12, Ngentiang-ah 3 leh Serchhip-ah mi 9 te an ni a, Serchhip-a hri kai enkawllai te hi New Serchhip-ah 4, P&E Veng-ah 3 leh Vengchung leh Leisang Veng-ah mi pakhat ve ve an ni.

Comments

Popular News (Last 30 Days)

LPG man bithliah thar