DIET Serchhip-a Lecturer sawn chungchangah MZP Hqrs. Serchhip in a tawp thlenga hmalak an tum

Mizo Zirlai Pawl (MZP) Hqrs. Serchhip chuan DIET Serchhip-a Lecturer post hnawhkhah loh te hnawhkhah thuai nise an duh thu sawiin, tunhnaia sawrkar in sawnchhuah tura a tih te pawh an aiawh dah an nih dawn loh chuan Transfer order hi sut leh nghal se an ti a, hemi chungchangah hian a tawp thlenga hmalak an tum thu an sawi bawk.

Tunhnaia Mizoram-a DIET Lecturer sawnchhuah chungchangah hian MZP Hqrs. Serchhip chuan nimin khan thutkhawm an nei a, hemi hnua thuchhuah an siamah Sawrkar thuchhuak (No,A.11013/2/2033-EDN, Dated 20th May 2004 leh No. B.18015/1/2013-EDN, Dated 7th July 2014) angin Serchhip DIET-ah hian Lecturer post 18 awm tur a nih thu leh hetihlai hian Lecturer 16 awmin chung zinga pakhat chu Secretariat (School Education)-ah attached niin a tak ah chuan 15 chiah an awm tih an tarlang a. Hetiang a nih lai hian July 15, 2022 khan Sawrkarin Transfer and Posting order tichhuakin Serchhip DIET atang hian Lecturer 3 (Science Lecturer 2 leh Mathematics Lecturer 1) chu anmahni thlaktu awm lova transfer an nih thu leh DIET Serchhip-ah hian Science Lecturer pakhatmah an awm tawh dawnlo tihna a ni tih an tarlang a. Heng bakah hian Lecturer pakhat chu Aizawl DIET-ah attached tura tih ni bawkin, Lecturer 4 lakchhuah an ni dawn tihna a nih thu leh Physical Education Lecturer pakhat chu rawn dah tura tih ni mah se Mizoram State Sport Council-a deputation a thawk lai a nih avangin rawn kal tur a awm chuang lo niin an tarlang.

MZP Hqrs. Serchhip chuan Sawrkar in Zirna In hniam ber atanga sang ber thlenga New Education Policy kalpui tura ruahmanna a kalpui mup mup lai leh DIET Serchhip ngei pawh Integrated 4years B.Sc, B.Ed zir theihna tura phalna a pek tawh laia hetianga Lecturer pawimawh tak tak pathum ngawt mai thlaktu awm lova sawn an ni chu a nghawng tur ngaihtuahin an ngaithiam lo hle tih an sawi a. Lecturer post hnawhkhah loh te hi hnawhkhah thuai nise an duh thu leh tuna Lecturer sawn chhuah turte pawh hi an aiawh dah an nih hma chuan chhuaklo tur leh Release Order pe lo turin Principal chu an ngen bakah an aiawh dah an nih dawn loh chuan Sawrkar hian Transfer order hi sut leh nghal se an ti a, Transfer Order hi sut a nih loh chuan a tawp thlengin hma an lak tur thu an tarlang bawk a ni.

Comments

Popular News (Last 30 Days)

Vawiin-ah HSSLC Exam result

LPG man bithliah thar