MLA atanga bang turin ka inpeih reng - BD. Chakma

Tuichawng bialtu MLA, Dr. BD. Chakma chuan kum 2013-14 chhoa CADC CEM a nih laia CADC Sawrkar sum hmang dik lo a puh an nihnaa Court-in thiamloh a chantir chungchangah a tul a nih chuan MLA atanga ban a inpeih reng tih a sawi.

BJP Mizoram State Vice President nibawk Dr. BD Chakma hian nimin khan Upper Republic-a an Party Pisa-ah thuthar lakhawmtute kawmin, an thubuai chungchang hi a sawifiah a. Zawhna chhangin Mizoram-a BJP MLA neihchhun Dr. BD. Chakma chuan, kum 2017-a Minister a nihna atanga huaisen taka a lo ban tawh ang khan tun tuma Court-in thiamloh a chantir chungchang ah hian mipui tana ding a nih angin a tul a nih chuan eng hunah pawh MLA atanga bang turin a inpeih reng tih a sawi a. Hetihrual hian, kum 2013 July ni 10-a Supreme Court-in MP, MLA leh MDC te thiamloh chantir an nih chungchangah hian thutlukna, rulling a siam tawh a, chutah chuan MP, MLA leh MDC tupawh thil tisual-a puh an nihnaah thiamloh chantir an nih a, kum hnih aia tlem lo lung In tanga tura hrem an nih chuan MP, MLA leh MDC an nihna atanga chawlh tir nghal tur tih a ni a, tuna CADC sum hmang dik loa puh an nih chungchanga Court-in thiamloh a chantirna ah kum khat chhung tang turin a hrem a, Supreme Court thutlukna ang chuan House Member atanga chawlhtir tur chuan a tlem berah kum 2 tih a nih avangin a chungchang hi Speaker-in ngun takin a ngaihtuah ang a, thutlukna dik tak a siam ngei a beisei tih a sawi.

Dr. BD. Chakma chuan, an chungchanga Court thuremna chu Court sang zawkah an khinglet dawn tih sawiin, hneh ngei pawh an inring tih a sawi a. Hlawh atan CADC sawrkar sum an hman puk chu an laka FIR thehluh a nih hma daihin a lo rul zo vek tawh a, hei hi thubuai chhuitu Case IO pawhin chiang takin a tarlang a ni, a ti a. Judge pawhin an sum hman puk a rulh leh vek tawh thu hi Judgement order-ah chiang takin a tarlang a, hei vang hian Judge pawhin an chungah zahngaihna lantirin, hremna nep thei ang ber a pe a, kum khat chhung tang turin a ti tih a sawi a. CADC Sawrkar sum hmang puka puh an nihna chu a pha lo tih sawiin, CADC CEM hlui Dr. BD Chakma chuan, Mizoram-a ADC pathum te hnenah Grand-in-Aid angin sum hi Financial Year khatah tum 4 Sawrkar in a pe thin a, hei vang hian hlawh an la mumal thei thin loa, MDC hlawh Rs. 53,000 te, EM hlawh Rs. 62,000 leh CEM hlawh Rs. 63,000 chu chhungkaw inenkawlna daih tawng tawng chauh a ni a, an enkawl mipui mamawh hrang hrang phuhrukna tur sum an mamawh ve reng bawk si avangin sum lo kal chu hlawh atan an lo hman puk mai a ngai thin tih a sawi a, sum an lak reng rengin dan ang thlapin engkim an kalpui thin tih a sawi bawk.

Comments

Popular posts from this blog

Tukverh-a tlasual boral