Mipui ten sawrkar sum leh pai dinhmun an hriat theih nan 'White Paper' tihchhuah MPCC in an phut

Mizoram Pradesh Congress Committee (MPCC) Executive Committee chuan mipuiten Sawrkar sum leh pai dinhmun dik tak an hriat theih nan 'White Paper' tichhuak vat turin Mizoram Sawrkar an phut thu an sawi.

MPCC hian nimin khan an President Lalsawta kaihhruaiin Aizawl a Lal Thanhawla Auditorium-ah MPCC Executive Committee Meeting an nei a, he Meeting hian Resolution siamin Mizoram Sawrkara Finance Commissioner-in sum leh pai lama harsatna a zualkai tur thu a sawi, nitin chanchinbu-a lo lang chu an ngai thutak hle tih tarlangin, “Ngun taka a zirchianin Mizoram sum leh pai dinhmun hian hniam lam a pan zel a, râlkhel dâr vuak a ngai ta hialah kan ngai,” an ti a. “Hetianga sum leh pai lama harsatna namen lo kan tawh chhan hi eng dang vang ni lovin, Pu Zoramthanga kaihhruai MNF Sawrkarin a tlaran zawnga ram an hruai vang a ni tih hi Congress Party hmuh dan a ni. Congress Sawrkar, Pu Lal Thanhawla kaihhruaiin inrenchem taka Mizoram sum leh pai dinhmun a lo siam that tawh sa, kum 4 pawh a ral hma a MNF Sawrkar hian dinhmun chhe takah a dah leh ta mai hi a pawi kan ti takzet a ni,” an ti.

MPCC Executive Meeting Resolution chuan Zoramthanga kaihhruai MNF Sawrkar hian hmuh lêt lehna tur awm miah lo thilah sum tam tak tak a hman thin avangin Mizoram leiba pawh nasa takin a pung tih sawiin, hei hi siamthat thuai a nih loh chuan Mizoram hi 'Leiba thang' (Debt trap) ah a tâng anga, mipuiten kan tuar nasa hle dawn niin an sawi bawk a. “Hetiang hi Mizoram sum leh pai dinhmun a nih laia Chief Minister leh Finance Minister ni bawk, Pu Zoramthanga'n ngawih a la chuh tlat hi a mawhphurhna a lâk thutak lohzia tichiangtu ah Congress Party chuan a ngai a. Finance Commissioner thusawi hi a dik a nih chuan MNF Sawrkar hi siamthat hna thawk tura a chet a hun kan ti a ni. Hetih rual hian mipuiten Sawrkar sum leh pai dinhmun dik tak kan hriat theih nan 'White Paper' tichhuak vat turin Mizoram Sawrkar hi kan phût tlat a ni,” an ti a ni.