Govt. Serchhip College-ah zirlai thar lawmna neih a ni
Govt. Serchhip College HD Rosanga Multipurpose Hall-a zirlai lut thar te lawmna hunah hian Bawrhsap Nazuk Kumar chuan Higher & Technical Education Department-a a awm laiin Govt. Serchhip Collge chu State Sawrkar hnuaia College zinga NAAC Grade A hmu thei awmchhun an nih avangin alo hmel-hriat tawh thu leh a ngaihven bik tih sawiin, an zinga hun a hmang thei chu lawmawm a tih thu a sawi a. Zirlaite hmalam hun thui tak hriltu pakhat thiantha thlan a ni tih sawiin, thian thlang thiam turin zirlaite chu a fuih a, College-a an zirlai hun chu nuam ti tak a hmang tura duhsakna hlanin, Grade A College an ni tih hre reng a, Grade A College zirlai anga awm turin a fuih bawk.
Bawrhsap chuan College tha ni tur chuan zirlaite an pawimawh tih pawh sawiin, an zirtirtu ten hna tha taka an thawh theihna turin an pawi-mawh a, anmahni chawk phurtu ni turin a fuih a. Zirna kawngah mahni tuina hrechiang a, chumi lam hawi a hmalam pan tura fuih bawkin, zirna mai piah lamah taksa hriselna ngai pawimawh a, taksa sawizawi uar turin a chah bawk.
Govt. Serchhip College ten nimin a Freshers Social an neih hi an College SU Vice President R. Lalmuanpuia chuan kaihruaiin, khual Zahawm leh he College Principal K. Laldinpuii bakah Professor te hnen atangin thu-sawi hrang hrang ngaihthlak a nih bakah zirlaite hnen atangin zai leh thiam thil chi hrang hrang entir a ni bawk.
Govt. Serchhip College-ah hian kumin 2022 Academic Sesson-ah hian BA 1st Semester-ah zirlai 128, B.Sc 1st Semester-ah zirlai 26 leh BCA 1st Semester-ah zirlai 8, an vaiin mi 162 in Admission an ti thar a, heng te nen hian kumin hian zirlai 493 an ni mek a ni.
Comments
Post a Comment