President atan Draupadi Murmu thlantlin a ni

India President thlanna a Vote tla te chu nimin khan chhiar niin BJP leh a kaihhruai, National Democratic Alliance (NDA) candidate Draupadi Murmu chu hneh taka thlantlin a ni.

India President thar thlang tura tun thla ni 18-a Vote tla te chu nimin khan he inthlanna Returning Officer Office, Room No. 63, First Floor, Parliament House, New Delhi-ah chhiar a ni a, BJP leh a kaihhruai National Democratic Alliance (NDA) Candidate Draupadi Murmu chuan Vote thlak thei 4,797 atangin Vote 2,824 a hmu a, hemi hlut zawng hi 6,76,803 niin a khingpui Eptu Party te Candidate Yashwant Sinha chuan Vote 1,877 hmuin hemi hlut zawng chu 3,80,177 a ni thung a, Vote thi 15 awmin hemi hlut zawng chu 10,500 a ni thung a, Draupadi Murmu hian Vote nung zawng zawng atanga chhutin za zela 64.03 hmuin hneh taka thlantlin a ni a, a khingpui Yashwant Sinha hian za zela 35.97 a hmu ve bawk a, Vote thlak thei zingah Vote thlak lo an awm bawk a ni.

Tribal politician Droupadi Murmu-i hi Tribal hmeichhe zinga India President ni thei hmasa ber a ni a, June 20, 1958 khan Droupadi Murmu-i hi Baidaposi, Odisha chhuak niin kum 64 mi a ni mek a, kum 2000-2009 chhung khan Odisha Legislative Assembly Member atan Rairangpur bial atangin thlantlin a lo ni tawh a, Naveen Patnaik-a Ministry hmasa, 2000-2004 chhung khan Minister of State niin kum 2015-2021 chhung khan Jharkhand State Governor a lo ni tawh bawk a ni.

Droupadi Murmu-i hian tun thla ni 24-a President term hmang zo tur Ram Nath Kovind chu a thlak dawn a, ram hruaitu hrang hrang ten duhsakna leh lawmpuina hlanin, tun thla ni 25 khian India President thar lakluhna inkhawm hi neih tura ruahman a ni.

Comments

Popular News (Last 30 Days)

LPG man bithliah thar