MLA, CADC-a CEM leh midang tang turin hrem an ni

Cheng nuai 137 tihchingpen thubuaiah Special Court (PC Act) Judge Vanlalenmawia chuan nimin khan Mizoram MLA nilai Dr. BD. Chakma leh Chakma Autonomous District Council (CADC)-a CEM ni lai Buddha Lila Chakma bakah CADC-a MDC ni mek pali leh MDC hlui pasarih te chu kum khat tang tur leh Rs 10,000 theuh chawi turin a hrem a, heng mii 13-te hi nimin vêk khan Special Court chuan bail-in a chhuah.

Chakma Autonomous District Council (CADC) hruaitu hlui leh hruaitu ni mek mi 13-te hi Special Court (PC Act) chuan July 22, 2022 khan eirûk thubuaiah PC Act 1988 Section 13(1)(d) leh Section 13(2) hmangin thiamloh a chantir tawh a, nimin khan heng mite hremna tur hi Court chuan a puang a, Court thuremnaa a lan danin, mi 13-te chu kum khat chhung Jail-a táng tur leh Rs. 10,000 theuh chawi tura tih an ni a; pawisa an chawi tur chu an chàwi loh chuan kum khat an tan tur bakah ni 30 dang an tàn belh ang. Hrem an nih dan tur puan a nih lai hian mi 13-te hi Court-ah an awm a ni.

Kum 2013-2014 vel khan sawrkar laipui atanga hmasawnna hna thawhna tur sum kal chu khatih laia CADC hotute'n hlawh atan an insem a, mahse, thubuai chhui a nih laiin pawisa chu an rûl vek hman thung a. Court chuan pawisa chu rûl tawh mah se, dan loa thil an tih avangin thiamloh a chantir a ni. Heng mite hremna tur puan a nih rual hian nimin vêk khan Special Court-ah bail an dil nghal a, Court chuan a phalsak a. Heng mi 13-te chuan Special Court thuthlukna chu Gauhati High Court, Aizawl Bench-ah an khinlêt an tum avangin dan anga bail an dilna chu phalsak a nih thu Special Judge chuan a sawi.

He thubuai lo intanna chu khatihlai a BJP Mizoram Pradesh-a General Secretary leh tuna President ni ta Vanlalhmuaka’n CADC-a sum tihchingpen awm nia a hriat Larsap hnena ziak-a a thlen atangin a ni a, hei hi Lawngtlai DC chhuitir a nih hnuah sum hman dan ah sum tihchingpen a awm tih hmuin District Council & Minority Affairs-a Under Secretary Zohmingthanga chuan April 20, 2018 khan ACB-ah FIR a thehlut a; ACB chuan chhuizuiin, April 26, 2019-ah Court-ah chargesheet an thehlut a ni.

Court-in táng tura a tih zinga mi, BJP MLA Dr. BD. Chakma, Tuichawng bialtu chu sum tichingpena puh a nih lai hian CADC-ah Chief Executive Member (CEM) a ni a; Buddha Lila Chakma chu CEM a nih mek bakah, a hma pawhin CEM a lo ni tawh. Táng tura tih zingah CADC Executive Member ni mek pahnih - Ajoy Kumar Chakma leh Mohan Chakma an tel a; Member of District Council (MDC) ni mek pahnih - Buban Kumar Chakma leh Amit Kumar Chakma an tel bawk a. A bak midang zawng chu kum 2013-2018 chhunga MDC an ni.

Comments

Popular posts from this blog

Tukverh-a tlasual boral