Kumin ah Cyber Crime thubuai 72 awm tawh

Kumin chhungin Cyber Crime Police Station (CCPS)-ah thubuai 72 ziahluh ni tawhin, Internet kaltlanga sum-a inbumna thubuai a tam hle a. CID (Crime) hotute chuan khawpui chauh ni lo, thingtlangah pawh Cyber Crime thubuai a tam tih an sawi.

Mizoram Police hnuaia CID (Crime) atanga thudawn danin kumin January atanga July thla kal mek chhungin Cyber Crime thubuai 72 ziahluh a ni tawh a, chung zinga 18 chu Internet kaltlanga sum-a inbumna niin, mipat hmeichhiatna kaihhnawih thubuai pasarih a awm bawk. Kumin hian January thla-ah Cyber Crime thubuai ziahluh a awm loh laiin February thla ah 4 ziahluh a ni a, March thla ah thubuai 46 zet ziahluh awmin April thla ah 7, May-ah 5, June-ah 2 leh July thla-ah 8 ziahluh a ni bawk.

CID (Crime) hotute chuan tunhnai chhoah internet kaltlanga suma inbumna a hluar thar hle tih an sawi a, thubuai an dawnte chu Aizawl khawpui chhunga thil thleng a tam ber rualin, thingtlang atang pawhin FIR an dawn tam thu an sawi a, Thubuai pakhata a tuartu (victim) pakhat aia tam awmna a awm thu leh chumi vang chuan a tuartu an tam tih an sawi bawk. 

CID (Crime) chhinchhiah danin, nikum chhung khan Mizoram-ah Cyber Crime thubuai 470 vel ziahluh niin, chung zinga zaa 70 vel chu pawisa lam kaihhnawih a ni.

Comments

Popular posts from this blog

Tukverh-a tlasual boral