I-Day Football khelh tan a ni ta

Nimin atang khan Serchhip Sports Complex-ah Independence Day Football, Division Screening Tournament ni nghal bawk chu khelh tan niin thla thar August 15 thleng khian khelh a ni ang.

Serchhip District Football Association (SDFA) in an buatsaih Independence Day Football Tournament, Division Screening Tournament ni bawk ah hian nimin khan 2nd Division ten inkhel tanin inkhel hmasa berah Group A atangin Keitum-I chuan Chhim Veng FC chu 3-1 in an hneh a, Keitum-I tan Amosa Lalthumawia, Lalthangmawia leh Lalremsanga ten goal khat theuh khungin Chhim Veng FC tan C. Lallungmuana chuan goal khat a khung bawk. Group A inkhel dangah Leisekawt FC chuan Vengchung FC chu 3-0 in an hneh bawk a, Leisekawt FC tan Laltlanhlua’n goal hmahruai a khung hnuah Lalchhandama chuan goal hnih a khung a ni.

Nimin-a inkhel vawithumna ah Dress UP FC chuan Darnam FC chu 2-1 in an hneh a, Dress Up FC tan Rosanglura chuan goal hnih khungin Darnam FC tan Lalthakima chuan goal khat a khung bawk a, nimin a inkhel hnuhnung ber ah Kawn Veng FC chuan FC Serchhip Kawnpui chu 11-0 in an sawp a, Kawn Veng FC tan Lalhlimawma leh Lalzamlova te chuan goal thum ve ve an khung bakah Lalruatsanga chuan goal khat a khung a, Rochamliana, Remsangpuia leh Lalrinsanga ten goal khat theuh an khung bawk a ni.

Vawiin hian 2nd Division te an inkhel chhunzawm dawn a, dar 10:00-ah inkhel tanin Group C atangin Chanmari FC leh New Serchhip FC inkhel hmasa in an Group atang hian Chhekhnai FC leh Field Veng FC an inhmachhawn leh anga, Group D atangin Dinthar FC leh P&E FC te inhmachhawnin Keitum-III leh Bungtlang Chhim Veng FC te an inhmachhawn leh dawn bawk a ni.

Comments

Popular posts from this blog

Tukverh-a tlasual boral