Tlawng hnar-a hmalakna enfiah

Gauhati High Court (Aizawl Bench) in a din Verification Team te chuan nimin leh niminpiah khan Tlawng Hnar, Zobawk Reserved Forest Area huamchhung chu a hmunah tlawhin an enfiah.

Tlawng Hnar Reserved Forest area chhungah encroachment a awm em tih zirchiang tur hian Gauhati High Court (Aizawl Bench) chuan May 18, 2022 khan Order tichhuakin hemi ang hian Mizoram sawrkar chuan June 3, 2022 khan Principal Secretary, EF&CC Department Chairman-na hnuaiah Verification Team a din a, Addl. Principal Chief Conservator of Forests (APCCF) chu Member Secretary niin Member atan Land Revenue & Settlement Sports & Youth Service, LAD leh PHE Department aiawhte an tel a ni.

He Verification Team te hi Member Secretary, Additional Principal Chief Conservator of Forests (APCCF), EF&CC Department, RS. Sinha hovin niminpiah khan Lunglei ah kalin nimin leh niminpiah khan Tlawng Hnar, Zobawk Reserved Forest Area huamchhung enfiahna (verification) an nei a, khawtlang hruaitute leh tlawmngai pawl aiawhten an tawiawm a, hemi hnu hian Lunglei DC Conference Hall-ah hemi chungchang a thutkhawm hi Lunglei DC leh Official dang te bakah Zobawk leh Lungpuizawl khawtlang hruaitute nen an nei bawk a ni.

He thutkhawm ah hian Zobawk leh Lung-puizawl aiawhte chuan LAD District Park leh Sports Complex sak mek te chu khawtlang tana ruhrel tangkai leh pawimawh an nih mai bakah Tlawng Hnar Reserved Forest Area notification dated 04/05/1978 in boundary description a sawi pawn lama awm nia an hriat thu an sawi a, PHE Department hmalakna a Check Dam siam tawh chu Zobawk leh a chhehvel khawtlangin tangkai taka hmang mekin Water Recharging Dam siam tum pawh tui hna humhalhna kawnga hmalakna tha tak anih thu an thlen a ni.