Lawngtlai DC in NH. 54 siam mek a hmunah a tlawh

Lawngtlai District Bawrhsap Amol Srivastava chuan Lawngtlai leh Kawlchaw 'W' inkar National Highway kawngpui laih zau hna thawh mek chu Inrinni khan tlawhin hnathawktute nen hmalak zui zel dan tur an sawiho nghal bawk.

Lawngtlai Bawrhsap Amol Srivastava hi Add. DC James Miahlung leh District Information & Public Relations Officer C. Lalhruaitluanga te'n tawiawmin, Lawngtlai College Veng-a 71 RCC atanga Kawlchaw 'W' thlengin kawngpui zauh hna thawh mek chu an en a. National Highway kawngpui zauh hna enkawltu National Highway Infrastructure Development Limited (NHIDCL) hotute, hna viltu Intercontinental Consultants and Technocrats Pvt. Ltd (ICT) leh hna thawktu Power Mech Projects Ltd (PMPL) hotute'n lo dawngsawngin, an thawh tawh chin dinhmun leh harsatna an neih te, an thawh chhunzawm dan tur ruahmanna te an lo hrilhfiah a. Bawrhsap hian kawng laihna leivung paihin ram leilung, lui dung leh ramngaw a tihchhiat loh nana leivung paihna tur hmun (spoil bank) an ruahman dan leh kawng laihna leivung an paih dan te enfiahin, ram leilung tichhe lo thei ang ber tura ruahmanna awm sa anga leivung paih turin hna thawktute chu a hrilh a ni.

National Highway-54 kawngpui zauh hna thawh mek hi package riatah then niin, Lawngtlai College Veng-a 71 RCC atanga Siaha District chhunga Zero (Maubawk) thleng hi Package-7 a ni a. NHIDCL enkawlna hnuaiah PMPL te'n he hna hi an thawk a. Lawngtlai District huam chinah 71 RCC leh Kawlchaw 'W' inkarah hian leivung paihna (spoil bank) ruahman sa 5 awmin, ram neitute nena inbiak remna anga leivung chhun khahna hmun (dumping area) 8 a awm bawk. NH-54 zauh hna Package-7 hi April 2024-ah zawh tura ruahman a ni.