Khaw pahnih-a Vawk thi ASF vang tih finfiah leh

Khawlailung leh Lungchhuan khua a Vawk thi te Sample chu enfiah a nih hnuah African Swine Fever (ASF) hri an kai tih hmuhchhuah a nih leh tak avangin Serchhip District chhunga khaw 8-ah ASF hri hi hmuhchhuah a ni tawh.

Serchhip-a AH&Vety Department atanga thu kan dawn danin Khawlailung leh Lungchhuan khua a Vawk thi te Sample enfiahna report hi kar kalta Zirtawpni, July 22, 2022 khan hriat a ni a, Khawlailung khua ah hian Vawk thi 3 awm tawhin Vawk dang 33 suat a ni tawh a, Lungchhuan-ah hian Vawk thi 7 awm tawhin Vawk pakhat suat a ni tawh bawk a. Heng te nen hian kumin March thla hnu lamah Serchhip District-a khaw 8-ah ASF hri hmuh a ni tawh a, ASF vanga Vawk thi 205 a nih bakah Vawk 233 suat a ni tawh bawk a ni.

ASF vang hian kumin ah East Lungdar-ah Vawk 82 thi tawhin 26 an suat tawh a, North Mualcheng-ah 48 thi tawhin 30 suat a ni tawh a, North Vanlaiphai-ah Vawk thi 26 awmin 24 an suat tawh a, Sailulak-ah Vawk 33 a thih bakah 28 suat a ni tawh a, Lungchhuan-ah Vawk 7 thi tawhin pakhat suat a ni tawh bawk a, Bawktlang khua ah Vawk 6 thiin 25 suat a ni a, Khawlailung-ah Vawk thi 3 awmin 33 suat a nih tawh bakah New Serchhip-ah Vawk thi la awm lo mah se 66 zet suat a ni tawh thung a.ASF hri leng hmuhna khaw hrang hrangah hian inkhuahkhirhna kalpui niin Vawk lakchhuah leh lakluh te khap a nih bakah Vawksa leh vawksa atanga siam thil chi hrang hrangte zawrh khap niin Vawk talh te pawh khap a ni bawk.

Hetihlai hian Serchhip District-a khaw thenkhat ah chhan hriatchian loh a Vawk thi a awm nual bawk a, Chhiahtlang khua ah Vawk thi 3, Serchhip Field Veng-ah pahnih leh Chhing-chhip Mualpui, Serchhip P&E Veng, Darnam Veng leh Vengchung-ah pakhat theuh a awm a, Serchhip Field Veng leh Hmar Veng ah Vawk pakhat ve ve suat a ni tawh bawk.

Comments

Popular posts from this blog

Tukverh-a tlasual boral