P&E Minister in Kau-Tlabung Hydel Project tihchangtlun theih dan tur a hmunah a enfiah

Kau-Tlabung Mini Hydel Project chu nimin khan  P&E Minister R. Lalzirliana chuan tlawhin he Project tih changtlun a nih theih dan tur hrang hrang thawktute a sawipui a. Tun dinhmunah helai hmun atang hian Kawlphetha siamchhuah tam theih ber laiin 2.4MW vel an siamchhuah theih thu thawktute chuan an sawi a ni.

Kawlphetha MW 3 pechhuak thei tura duan Kau-Tlabung Mini Hydel Project hi P&E Minister hian a hmunah tlawhin P&E Department-a SE (Transmission Circle) C. Lallawmsanga leh P&E Serchhip Division-a Sr. Executive Engineer Laltlanthanga bakah Serchhip DIRPO K. Saitluanga ten an tawiawm a. P&E Minister hian Kau-Tlabung Hydel Project Tuikhuah chu tlawh hmasa berin lian zawka Tuikhuah siam theih dan tur a awm leh awm loh te en hmasain thawktute awmna hmun ni thin, building chhiat avanga luah chhunzawm theih tak loh te, he Tuikhuah atanga kawlphetha siamchhuah a nih theihna tura tui lakna te leh Electric siamchhuahna hmun, Power House te a tlawh a, thawktu ten an hnathawh dan hrang hrang te an hrilhfiah bawk a ni.

P&E Minister chuan sawrkar kal tawh leh P&E Department-a thawktu ten Project tha tak leh Mizoram tana tangkai tak an lo siam tawh chu a hmunah a la tlawh loh thu leh P&E Minister a nih anga tlawh ngei chu a duh avanga tlawh a nih thu helai hmun a tlawhna ah hian a sawi a, Kawlphetha siamchhuak tura Tuikhuah thar siama ram zau tak tak tui chim tir chu thatlohna tam tak a awm theih avangin Tuikhuah awmsa te cheibawla kawlphetha tam zawk siamchhuak thei tura ngaihtuahna an sen thu leh chumi atan chuan Kau-Tlabung Hydel Project pawh hi cheibawl dan a awm thei em tih te ngaihtuaha helai hmun hi tlawh pah a ni tih a sawi a, tuna Tuikhuah awm mek chu a khuahna sang zawka siama tui tam zawk khuap tur leh kawlphetha tam zawk siam theih a nih dan tur bakah chumi atan chuan a Tuikhuah thuthmun te a tha tawk em tih te pawh an en nghal thu a sawi bawk a. Department hotute nen hmalak zel dan tur an la sawiho leh tur thu a sawi bawk.

P&E Department-a SE (Transmission Circle) C. Lallawmsanga chuan khaw chhia leh kawng chhe tak kara P&E Minister in helai hmun a tlawh chu lawmawm a tih thu a sawi bawk.

Kau-Tlabung Hydel Project hi May 5, 2005 khan hman theih tura hawn a ni a, kawl-phetha MW 3 siamchhuak thei turin kawlphetha MW 1.5 siamna khawl pahnih dah a ni a, helai hmun enkawltute chuan tun dinhmunah kawl-phetha an siamchhuah theih tam lai berin MW 2.4 vel an siamchhuah theih thu leh harsatna lian lutuk an neih loh thu te an lo sawi a ni.