Mizoram-ah COVID-19 hri kai la hmuh belh zel

Mizoram-ah ni khat-a COVID-19 hri kai hmuhchhuah zat a la tlahniam thei meuh lova, niminpiah khan Sample 469 enfiah leh niin heng atang hian COVID-19 hri kai mi 140 hmuhchhuah an ni a, Sample enfiah atanga chhutin za zela 29.85 te chuan hri an kai a ni.

Niminpiah a hri kai hmuhchhuah zinga 137 te hi Rapid Antigen Test hmanga hri kai hmuh te niin ZMC-a RT-PCR Laboratory atangin hri kai mi 3 hmuh an ni bawk a, heng hri kai hmuhchhuah te hi Aizawl District-ah 75, Lunglei District-ah 15, Mamit District-ah 14, Saitual District-ah 10, Kolasib District-ah 8, Serchhip District-ah 6, Champhai District-ah 5, Khawzawl District-ah 4 leh Lawngtlai District-ah mi pathum te an ni.

Nimin khan Mizoram District hrang hrang 6 atangin COVID-19 hri kai enkawl dam mi 143 an awm leh bawk a, heti hian nimin tlai dar 5:00 thleng khan Mizoram-a COVID-19 hri kai hmuhchhuah tawh chu 2,31,066 niin an zinga 2,29,618 te chu enkawl dam an ni tawh a, hri kai hmuhchhuah atanga chhutin za zela 99.37 te enkawl dam an ni tawh a, hri kai enkawllai mi 742 la awmin hri kai zingah mi 706 an boral tawh bawk a ni.

Tun dinhmunah District tinah hri kai enkawllai la awmin hri kai enkawllai tamna ber Aizawl District-ah mi 368 enkawl mek an ni a, Lunglei District-ah pawh 156 enkawl mek an ni bawk.