Champhai leh Hnahlan-ah Grape lei mek a ni

Hnahlan Grape Growers’ Society chuan tunkar Thawhtanni, July ni 18 thleng khan Grape rah quintal 900 an lei tawh a, Champhai Grape Growers’ Society te pawhin quintal 67.57 an lei tawh.

Mizoram-ah Grape Wine hralhchhuah phal ni rih lo mahse Hnahlan leh Champhai-ah Wine a siam tur Grape lei mek a ni a, Hnahlan Grape Growers’ Society hruaitute sawi danin kumin hian June ni 20, 2022 atangin Grape rah hi an lei tan a, kumin hian kg. ah Rs. 60 zel a leiin tunkar Thawhtanni thleng khan quintal 900 an lei tawh a, quintal 1400 bawr vel lei theih an in beisei a ni. Grape an lei te chu Winery-ah a tui an sawr nghal zel a ni bawk. Champhai Grape Growers’ Society te pawhin June ni 13, 2022 khan a thawh khatna atan kg. ah Rs. 60 zelin Grape rah quintal 67.57 an lei a, a thawh hnihna atan Vawiin hian an lei leh ang. Grape rah te chu lak/lei ni bik an siam a, kar khat-ah vawi khat emaw, a hmin dan zirin vawi hnih emaw lei turin ruahmanna an siam a. Kumin ah quintal 1300-1500 vel lei theih an inbeisei thu an sawi bakah Champhai Winery-ah Grape tui sawr sa Wine a siam mai theih litre nuai 1 chuang a awm mek bawk a ni.

Hetihlai hian Mizoram sawrkar chuan Wine Rules a duang mek nia hriat niin, tun dinhmunah vet (pawmpui/endik) turin Law Department-ah a thang mek nia hriat a ni a. Hnahlan leh Champhai Grape Growers’ Society hruaitute chuan Wine Rules chu peihfel a nih hunah Cabinet pawmpuina nghak kher lo a 'by circular' ang pawha hman theih an beisei tih an sawi a, chu chu dinhmun hmanhmawh thlak taka an awm tawh vang niin an sawi bawk.