Latest News

July 2022 atanga Aizawl khawpui chhunga Gas Home Delivery kalpui tumna a hlawhtling rih lo

Mizoram sawrkarin July, 2022 atanga Aizawl khawpui Veng engemaw zat-a Gas Home Delivery kalpui tan a tum chu harsatna neuh neuh avangin tihhlawhtlin theih a la ni lo a, FCS&CA Department chuan Home Delivery hi a rang thei ang bera kalpui turin hma an la chhunzawm zel.

Zalen-in Food, Civil Supplies & Consumer Affairs Department thawktute hnen atanga thu a dawn danin Gas Home Delivery hi a hmaa lo kalpui tawhna Veng pali bakah Veng 30 dangah kalpui tum a ni a, heng zinga Veng thenkhatah chuan hmalakna awm mah se Veng tam zawkah la kalpui a nih loh avangin tum angin thil a la kal thei lo tih an sawi.

FCS&CA thawktute chuan, “Home delivery kalpui tur hian mipuiten Gas an book a ngai a; mahse, book an tlem avangin Gas Agent-te tan mi 2/1 lek pek chu a buaithlak avangin an ti thei lo a ni,” an ti a. Agency lam pawhin Home Delivery ai chuan Point Delivery hmanga sem chu an la duh zawk niin an sawi bawk. Home delivery chu IOC duh dan a nih avangin kalpui ngei tumin hma an la mek tih sawiin FCS&CA thawktute chuan, “Tuna Veng thlan bikah te hian smooth taka kan kalpui hunah chuan la kalpui ve lohna Veng-ah te pawh kalpui zel a ni dawn a. Aizawl Veng pum puiah Home Delivery hi kalpui a nih chuan tuna consumer-ten Rs. 70 an chawi thin chu chawi a ngai dawn tawh lo a ni,” an ti.

FCS&CA thawktute chuan Home Delivery chu India ram State dang, tlangram-ah te pawh kalpui a ni tih sawiin, IOC norms-ah Point delivery a awm lo niin an sawi a, “Godown a lak a nih loh chuan Home delivery chiah hi norms-ah tarlan a ni,” an ti bawk.

LPG Home delivery hi kum 2019 atang khan bultan a niin a hmasa ber atan Mizofed chuan College Veng-ah bul an tan a, a hnuah Zothan Gas Agency-in Zonuam Veng-ah tan ve lehin, Caravan-in Falkland leh Suakchhunga Gas Agency-ten Dawrpui Veng-ah te an tan leh a. Aizawl khawpui chhunga Gas Agent 11 te chu an huamchhunga Veng thlanbik ah te July 2022 atangin kalpui tan leh tura tih an ni.

Aizawl khawpui chhunga Gas Home Delivery kalpui tumna Veng te hi DCSO 'East' hnuaiah Ramhlun Venglai, Ramhlun Sports Complex, Armed Veng South, Chite, Chaltlang, Chaltlang Lily Veng, Zemabawk, Zemabawk North, Zuangtui, Muanna Veng, Selesih leh Ramhlun North te an ni a. DCSO ‘West’ hnuaia Home Delivery kalpui tan tumna Veng te chu Khatla, Khatla East, Kanan, Zotlang, Tuikhuahtlang, MINECO, Venghnuai, Thakthing, Tlangnuam, Tlangnuam Vengthar, Saikhamakawn, Hunthar, Luangmual, Govt. Complex, Venghlui, Republic Vengthlang leh Rangvamual te an ni.

Comments

Popular News (Last 30 Days)