Latest News

ZPM in CSS sum pek ngun taka enzui an tum

ZPM Leader Lalduhoma chuan CSS sum Department-a pek chungchang chu ngun takin an enzui dawn tih a sawi.

Tuichang bial fanga zin ZPM Leader Lalduhoma hian nimin khan Khawzawl Zuchhip Ceng leh Khualen-a Vantlang Inkhawm ah thu sawiin, Chief Minister in kan ram a enkawl danah lungawi a har an tih thu leh a kutah budget an dah ngam tawh lo tih sawiin, “Kan Finance Commissioner-in kan ram sum dinhmun that loh zia chiang takin a sawi a. Hetianga sawrkar Official te hial an tawng chhuak hian kan sum dinhmun that loh zia a tarlang chiang hle a ni,” a ti a. Centrally Sponsored Scheme (CSS) Central-in a dawngtu tur hnena pechhuak tura a tih chungchang sawiin, “Central sawrkarin CSS sum a nihna tura hman a nih theih nan huntiam neiin a dawngtu tur Department hnenah pechhuak tur State sawrkar a tih angin, Mizoram sawrkar chuan veibelchhe tam tak CSS Fund atanga a hmuh chu a pechhuak niin kan lo hria a, a lawmawm pawh kan ti hle,” a ti.

ZPM Leader chuan hetiang a nih mek lai hian Central hmuha pechhuak tawh anga lang siin Mizoram sawrkar chuan a pekchhuah tawh nia hriat te hnen atang hian engemawzat chhuhlet leh tumna a awm mek nia hriat a nih thu sawiin, “Hetiang hi a lo awm tak tak a nih chuan uluk takin kan enzui dawn a. Hetianga chhuhlet leh a, Department hnen thleng lo te a awm tak tak a nih chuan Department (Implementing Agency) te hian sum hman tur a kimchangin an nei dawn lo tihna a ni a. Chu chuan development anih tur angin a nihtir theih dawn loh bakah, hetianga pechhuak tawh anga lang a nih si chuan Utilisation Certificate an thehluh leh te pawh a la ngai dawn a. Thehluh tur an nei dawn lo emaw, Utilisation Certificate lem an thehluh emaw a ngaih phah dawn tihna a ni bawk ang,” a ti a. “Central-in pechhuak vek tura a tih laia Central hmuha pechhuak tawh anga inlantir a, Department hnen atanga sum hnuhlet leh hi a awm tak tak a nih chuan thil fello tak a nih dawn avangin ngun takin he thil hi kan enzui ang a, kan ngawihpui mai mai dawn lo a ni,” a ti bawk.

Comments

Popular News (Last 30 Days)