Chhiatna thleng thei lakah fimkhur a tul thu sawi

Disaster Management & Rehabilitiation Department changtu Minister Lalchamliana chuan khuarel chhiatrupna hrang hrang leh mihring thlen chawp harsatna te chu engtik lai pawha thleng thei a nih avangin kan fimkhur a tul thu a sawi.

DM&R Department in Mizoram Sawrkar hnuaia Department hrang hranga DM&R changtu Nodal Officer te tan anmahni Office theuha hman tur Disaster Management Plan siam leh duan chungchang leh a pawimawhna te inzirtirna ni 2 awh tur hawnna nimin-a ATI Auditorium-a neih a hmanpuina ah he thu hi sawiin DM&R Minister chuan heng vanduaina hrang hrang lakah hian mitin kan fimkhur a, a theih ang ang a kan lo inven a, hma kan lo lak lawk a, kan lo inpuahchah chu thil pawimawh leh tul tak a ni tih a sawi a. Sawrkar Department tan pawh chhiatrupna laka invenna kawngte, chhiatna a thlen palha hmalak dan tur lo duan leh ruahman lawkte, Sawrkar hmunhma, Office, bungrua, lehkha pawimawh leh thawktu him leh him lohah ngaihtuahna sen a tul thu sawiin, Disaster Management Plan felfai tak ruahman leh an lo neih sa te tih changtlun a pawimawh thu a sawi bawk.