Mizoram-a Japanese Encephalitis vei hmasa ber Serchhip District mi hmuhchhuah a ni
Serchhip CMO Office atanga thu kan dawn danin Thenzawl khuaa damlo mipa pakhat, kum 68 mi chu tunhnai khan damlohna avangin Aizawl-a Private damdawi In pakhat ah enkawl niin a dinhmun enin Thosi (Culex) seh atanga inkaichhawn theih, Japanese Encephalitis nia rinhlelh a nih avangin tun thla ni 14 khan a Sample (Serum leh CSF) chu Kolkata-ah enfiah tura thawn a ni a, tun thla ni 18 khan result chhuakin Japanese Encephalitis a kai tih hmuhchhuah niin Mizoram-a he hri kai hmasa finfiah hmasak ber nia hriat a ni a, tunah hian sawrkar chuan ruahmanna siamin an enkawl mek nia thudawn a ni bawk. Health Department atanga kan thudawn chuan he damlo hian tun thla tir lam atang khan insawiselna a nei tih an sawi a, tunah hian amah enkawl mekna, Private damdawi In-ah hian enkawl mek a nih thu leh a dinhmun enfiah reng a nih thu an sawi.
Serchhip-a Health Department hotute chuan he hri kai hmuh chungchangah hian Thenzawl CHC-a Medical Officer leh thawktute chu he natna chungchang mipuite inzirtirna nei tur leh Thosi ti rem tura hma la tura thurawn an pek thu sawiin, he hri kai zawnchhuah a nih theihna turin JE Test Kit te pawh thuneitute hnenah an dil tawh thu an sawi a. Tun tuma hri kai hmuhchhuah hi Serchhip District mi ni mah se an hmuhchhuahna hi Aizawl lam a nih avangin Aizawl District lamin report an khawih thu sawiin, he natna hi Malaria thehdarh theitu Thosi ten an thehdarh loh thu leh Thosi chi khat, Culex an tih, JE virus pai te chauhin an thehdarh theih thu an sawi a, Thosi laka invenna- Thosilen zar that te, ram kal ten kawr ban tluan leh kekawr tluan hak, Thosi hlo chhit te, tui tlin theihna In leh bul vel te tihfai that te lo uar lehzual turin an chah a ni.
Thenzawl CHC-a Medical Officer chuan he natna kai chungchangah hian thuneitu sang te thu an ngaihchan mek thu leh Vawiin lam hian thu thar a awm an beisei thu LENKAWL an hrilh a, mipuite tan lo chi-ai na tur a awm loh thu an sawi bawk.
Japanese Encephalitis (J.E) hi Mizoram in kan la hmelhriatloh leh kan ram a la awm ngai lo natna niin Thosi chikhat ‘Culex thosi’ in a thehdarh deuh ber a, Thosi leh kan ranvulh thenkhat zinga mi Vawk inkara inkaichhawn ni deuh berin, Vawk bakah hian heng ran dang - Bawng, Lawi (cattle), Ar (poultry) te hian an kai thei a, heng Thosi te hian mihring an seh chuan mihring in he natna an kai chhawng ve leh thei a ni. He natna lanchhuah dan tlangpui chu Khawsik sang tak a intan in, Kaih, Rilru lam buaina te leh awm hle hle theihlohna te leh hriatna tibuai zawngte in a langchhuak thin a ni.
Comments
Post a Comment