DM&R Minister in vanduaina thlenna hmun a tlawh

Aizawl Republic Venghlun, Lungli Road-a lei tawlhna hmun chu nimin tlai khan DM&R changtu Home Minister Lalchamliana chuan a hmunah tlawhin a enfiah a, vanduaina tawk te thinlung taka a tawrhpui thu sawiin, chhiatrupna a lo thlen thulha DM&R atanga tanpuina awm thei te pawh ngaihven nghal a nih thu leh tanpuina pek tur zat hi Central sawrkarin inkaihruaina a siam ang a nih thu a sawi bawk. Home Minister hian Local Level Disaster Management Committee, Republic Veng hnenah tanpuina Rs 50,000/- leh Relief Camp a awm te tana ni 3 chhung atan Relief Rs. 17,760/- a hlan a. YMA hnenah thingpui lumna turin Rs. 10,000/- a pe bawk.

He hunah hian Aizawl District Disaster Management Authority Chairman Dr. Lalhriatzuali Ralte chuan DDMA atanga hmalak theih ang ang te chak taka bawhzui a ni dawn tih a sawi a. Zonal Officer Lalhruaitluangi chuan helai lei che hi nikum October thla khan an enfiah tawh thu leh kumin July 23 atang khan a rawn che nasa zual tih a sawi a. A theih ang angin chhiatna liantham pumpelh nan inthiarchhuah, ruahtui luhna lai khuh leh thil tul dang te tih nghal a ni tih a sawi bawk. Helai hnai ah awm chhungkaw 36 te chuan an In an chhuahsan tawh a ni.