Latest News

Serchhip-ah Northeast Yatra for Lifestyle (Life) nei mek

Image
India hmarchhak State 8-a tun thla (November) chhunga neih tura ruahman Northeast Yatra for Lifestyle (Life) chu kar hmasa lamah Mizoram tana a hawnna hun hman a nih hnuin Serchhip District-ah pawh kalpui mek a ni a. He Yatra neih chhung hian mipuite hnenah tam zawk leh zau zawkin ‘environment’ humhalh leh venhim pawi-mawh zia zirtirna pek tura ruahman niin tunah hian In tin-a lut lawrin hemi chungchang inzirtirna neih a nih bakah thuziak te sem a ni a. Vawiin hian North Vanlaiphai-ah Mass Rally neiin hman khat daih Plastic thenfai hnatlang neih nghal a ni anga, naktuk-ah Govt. Serchhip College-ah hemi chungchang inzirtirna hi neih leh a ni ang.

Sports Complex-ah Football khel zel

Serchhip Sports Complex-a Independence Day/Screening Football Tournament 2022 khelh chu tluang taka chhunzawm zel niin thla thar August 15 thleng khian khelh tur a ni ang.

Serchhip District Football Association (SDFA) buatsaih Independence Day/Screening Football Tournament 2022 khel mekah hian nimin khan 1st Division ten an match hnihna khelin inkhel hmasa berah Hmar Veng FC chuan Chhekhnai FC chu 4-2 in an hneh a, Hmar Veng FC hian match hnih an khelh tawh ah hnehna an la chang ve ve a ni. Nimin a inkhel ah hian Hmar Veng FC tan C. Lalawmpuia, Lalfamkima, Lal-hunthar leh Ramdinthara ten goal khat theuh khungin Chhekhnai FC tan Lalnunmawia leh Vanlalfakawma ten goal khat ve ve an khung a ni.

Inkhel vawi hnihna ah Vengchung FC chuan match hmasa a tlawm tawh Bungpui FC Hriangtlang chu si li faiin an hneh ve leh a, Vengchung FC tan Zonuntluanga, Joshua Lalrinzuala, Jerry Laldikkima leh Lalruatfela te chuan goal khat theuh an khung a ni.

Inkhel vawi thumna ah match hmasa a chak lo ve ve AWC FC leh Chanmari FC inhmachhawnin Chanmari FC in 3-1 in hnehna an chang a, Chanmari FC tan Felix Lalruatsanga chuan goal hnih khungin V. Lalmalsawma chuan goal khat a khung a, AWC FC goal awmchhun hi Zothantluanga khung a ni. Inkhel hnuhnung berah FC Serchhip Kawnpui leh New Serchhip FC te goal khat ve ve inpe in an inhnehtawk a, FC Serchhip Kawnpui tan C. Lalrinngheta chuan goal khung in New Serchhip FC tan H. Vanlalremruata chuan penalty atangin an si phurh a sut a ni.

Vawiin hian Second Division ten an match hnihna an khel ve leh dawn a, zing dar 9:30-ah inkhel tanin Group D atangin Dinthar FC leh Bungtlang Chhim Veng FC an inhmachhawn anga, hemi hnu hian Group C atangin Chanmari FC leh Chhekhnai FC inhmachhawnin Group A atangin Chhim Veng FC leh Leisekawt FC bakah Bungtlang Bazar FC leh Keitum FC-I an inhmachhawn anga, inkhel hnuhnung berah Darnam FC leh Kawn Veng FC te an inhmachhawn bawk ang.

Comments

Popular News (Last 30 Days)