Sawrkar in thalaite tan infiamna hmun hma buatsaih kawngah theihtawp a chhuah mek - Dy. Chief Minister

Deputy Chief Minister Tawnluia chuan Mizoram Sawrkar in thalaite tan infiamna hmun hma hrang hrang buatsaih kawngah theihtawp a chhuah mek thu a sawi.

LBS Suzuki All Mizoram Inter-Village Football Tournament kharna inkhawm nimin chawhnu-a Aizawl Lammual-a neih a hmanpuina Deputy Chief Minister Tawnluia chuan Mizoram Sawrkar in thalaite tan infiamna hmun hma hrang hrang buatsaih kawngah theihtawp a chhuah mek thu hi sawiin, Covid hripui leng avang erawh in duhthusam angin hma a lak theih loh tih a sawi a. Chuti chungin Chief Minister kaihhruaina hnuaia Sports & Youth Services kaltlangin a theih ang angin hma lak chhoh mek a ni, a ti. Deputy Chief Minister chuan Aizawl khawpuia Football khelhna tur Field puitling 2 chauh kan neih in min dawl tawh lo tih sawiin, UD&PA Department hnuaia Smart City Project katlangin Aizawl khawpui chhunga khelmual 6-ah Phullem phahna tur Tender mek a nih thu a tarlang a. Hetianga Tournament lian neih leh hunah chuan Lengpui leh Sairang-ah te inkhel ngai tawh lovin Aizawl khawpui ah ngei a rualin hmun 6/7-ah a ruala inkhelh theih a beisei thu a sawi a ni.

Deputy Chief Minister Tawnluia chuan Lammual chu Mizo mipui rilru ah a lianin kan ngaihlu hle tih pawh sawiin, Lammual hi I-League Match inkhelh theihna turin chei leh ruahman chu Sawrkarin a tum thu a sawi a. LBS Suzuki All Mizoram Inter-Village Tournament chu inelna satliah a ni lo tih sawiin, Mizoram thalai ten hma lam an panna tur a ni a, Mizoram mai ni lo Mizoram pawna Football Club te pawhin player tha te thurchhuakin an Club zawm tura an ziahluh mek nia a hriat thu chu he Tournament hlawhtlinna lian tak a ni tih a sawi bawk.