Hri kai enkawllai 59 awm

Chawlhkar khat zet Serchhip District-a COVID-19 dinhmun tarchhuah a awm loh hnuah nimin khan dinhmun thar ber tarchhuah niin hri kai enkawllai mi 59 an awm mek.

Nimin-a Serchhip District-a COVID-19 dinhmun tarlan thar ah hian tun thla ni 11 hnu lama hri kai hmuhchhuah te chu tarchhuah niin hri kai hmuhchhuah mi 59 an awm a, heng zinga 14 te chu Serchhip Town chhunga hri kai hmuhchhuah niin P&E Veng-ah 6, Serchhip Vengchung, New Serchhip Bazar Veng leh New Serchhip Venglai-ah mi pahnih theuh leh Serchhip AOC Veng leh Bazar Veng ah mi pakhat ve ve te an ni.

Heng bakah hian East Lungdar-ah hri kai mi 18 awmin Thenzawl Vengthlang-ah mi 12 leh Lungpho-ah mi 11 an awm a, Ngentiang ah hri kai mi pali an awm bawk a ni.

Kar hmasa Thawhtanni atanga report siam mumal a nih loh avangin kar kalta Thawhtanni atanga nimin thlenga hri kai enkawl dam te chu nimin khan hri kai enkawl dam zingah ziahluh an ni a, an vaiin mi 50 an ni.

Heti hian nimin tlai thleng khan Serchhip District-a COVID-19 hri kai hmuhchhuah tawh chu 14,192 niin an zinga 14,098 te chu enkawl dam an ni tawh a, hri kai hmuhchhuah atanga chhutin za zela 99.33 te enkawl dam ni tawhin hri kai enkawllai mi 59 an la awm a, hri kai zingah mi 35 an boral tawh bawk a ni.