Khawvel hriata Mizo tawng pholan theih nan hma la

Khawvel hriata Mizo tawng pholan a nih theih nan sawrkarin hma a la zel tih School Education Minister Lalchhandama Ralte chuan a sawi.

Mizo Grammar Society buatsaih ‘Mizo Tawng Ziah Dan Dik’ tih lehkhabu tlangzarhna hun nimin-a a Pisa-a neih ah Education Minister Lalchhandama Ralte chuan he thu hi sawiin, Mizo tawng tihmasawn te, hnam inpumkhatna tura Mizo tawng pawimawhna te hriain a tih hausaka tih lar hi hnam anga ram lak nan a tul tih sawrkar in a hria tih a sawi a. SEDP Board 14 din a lo nih khan HRD pawh din a nih thu leh a hnathawh tur zingah hian Chief Minister-in Mizo tawng humhalh leh tihhausakna tur atana hmalak hi a sawi tel tih sawiin, chumi bawhzuina kal zelah chuan Mizo Language Board (MLB) din a nih thu leh Gazzette-a chhuah a nih hnuah Law Department pawmpui turin thehluh a ni tawh tih a sawi a. MLB Office atan MYC Office hlui chu an luah dawn thu leh Chairman leh Secretary te pawh hun reilote ah tihfel a nih tur thu a sawi.

Social Media-ah Mizo tawng hman dan dik lo a tam thu leh thangtharte zingah ziah dan dik hre lo an tam tawh thu sawiin, Mizo Grammar Society-ten ziah dan dik hriatna tur lehkhabu an chhuah chu lawmawm a tih thu a sawi bawk.