Chief Minister in thalaite ruihhlo a fihlim tur leh hun hmang tangkai thiam turin a chah

Chief Minister Zoramthanga chuan nimin khan Aizawl-a College pahnih in Freshers' Social hun an buatsaih chu hmanpuiin thalaite chu hlawhtlinna kawng an zawhna ah hmasawnna tithuanawp thei ruihtheihthil laka filhim tura chahin, hun hman tangkai thiam turin a fuih bawk.

Chief Minister Zoramthang hian nimin khan Govt. Aizawl North College in Aizawl Electric Veng  YMA Hall-a Freshers' Social cum Falicitation Program an buatsaih chu hmanpuiin thalaite chu hlawhtlinna kawng an zawhna ah hmasawnna tithuanawp thei ruihtheihthil laka filhim turin a chah a, zirlai tharte lawmna leh zirlai hlawhtlinna changte lawmna hun hmanna a telpui thei chu lawmawm a tih thu sawiin, zirlaite chu anmahni leh an chenpuite, khawtlang leh ram tan mi chhenfakawm ni tur chuan nun uluk a, ruihhlo chi hrang hrang laka fihlim a pawimawh thu a hrilh a. Sawrkar in sum tam tak sengin ngawlvei hrang hrang enkawlna hmunhma te a ruahman thin te, NGO, Kohhran leh khawvel huap pawha sum leh tha tam tak senga ruihhlo vanga kan buaina te hi keimahni theuhin ruihhlo kan tih loh theuh mai hian buaina kan insiam lo mai zel a nih thu a sawi a. Tumruhna leh chhelna nei tan ngam loh a awm loh thu pawh sawiin, mahni inthunun turin tumruhna nasa tak nei turin kalkhawmte chu a chah a ni.

He hunah hian Chief Minister hian he College atanga MZU Rank Holder pali te hnenah lawmpuina a hlan a, College Principal Prof. S. Haukhanlian Mate pawhin zirlai tharte chu zirlai an nih laiin hun hlimawm hmanga zirlai-ah theihtawp chhuah turin a fuih bawk a ni.

Nimin vek khan Chief Minister Zoramthanga hian Aizawl Vanapa Hall-a Govt. Aizawl College Freshers' Social chu hmanpuiin he College-a lut thar te chu bul thar tan tur an nih angin, lehkhapuan la ziahloh thar hlakah an nun an ziak dawn a, keulet a inchhirna tlem thei ang ber an neih nan an nun uluk a, fimkhur takin an hun neih te a tha leh tangkai thei ang bera hmang turin a chah a. Chief Minister chuan khawvela mihring in hun kan neih zat a inang vek tih sawiin, chu kan hun neih kan hman tangkai thiam dan chuan kan hma hun a hril dawn tih a sawi a, “Hun kal tawh siamthat a lamlet chakna ringawta kan khah loh nan, tunah hian kan nun kan fimkhur a, ngaih-tuahna fim nen ke pen a tul a ni,” a ti a. Taimakna, tumruhna leh nun ulukna nen, hriselna leh ngaih-tuahna tibuai theitu ruihhlo laka fihlim bawkin an hun hmanga, duhthlanna dik hmang turin zirlaite chu a chah bawk. Chief Minister hian Academic Award leh Sport Award a hlan bawk a ni.

Comments

Popular News (Last 30 Days)

Vawiin-ah HSSLC Exam result