Treasury khar ngai ang em em chuan la awm lo

Aizawl South Treasury Officer chuan tun dinhmunah sum harsatna tawk mek mah se Treasury khar ngai ang em em chuan an la awm rih lo tih a sawi.

Zonet-in a kawmnaah Mizoram-a Treasury lian ber, Aizawl South Treasury Officer, Dr. K. Lalnghinglova chuan, tuna sum leh pai-a Mizoram in harsatna a tawh chhan chu Sawrkar laipui thupek anga CSS sum pekchhuah vang a ni ber tih a sawi a. Tunah hian hun pangngaia nitina hna an thawh ang kha an ti thei rih lo a, Sawrkar atanga thupek an dawn ang zelin an kal a, tun dinhmunah Bill dawng reng mah se, sum pekchhuah lam chi reng reng an ti thei rih lo a, tuna harsatna hi CSS sum pekchhuah vanga thleng ni mahse, hetiang harsatna hi tunhma lamah pawh an lo tawk zeuh zeuh tawh a, tun hi a tum khatna a ni hran lo tih a sawi. 

Dr. K. Lalnghinglova chuan, Sawrkar laipuiin CSS sum pekchhuah dan tura ruahmanna a siam angin Mizorama Treasury lian ber Aizawl South Treasury-in tunhnai khan cheng vbc. 400 vel a pechhuak a, Aizawl North Treasury pawhin cheng vbc. 200 vel a pechhuak tawh a, Sawrkar hnathawk hlawh atan ni lo hetiang zat sum tum khata pekchhuah a ni hian sum enkawl kawngah harsatna a thlen tih a sawi a, Sawrkar laipui ruahmanna hi a tha vek kher bik lo a, CSS atan sum hmuh ni 21 chhunga Department hnena pek chhuah nghal tih pawh Financial Rules kalh a nih theihna chen a awm ve tih dan te a sawilang bawk a ni.