Baktawng VC by-election atan Draft Roll tarchhuak

Baktawng Village Council-a Reserved Seat a ruah avanga bye-election neih tur inbuatsaihna atan nimin khan he inthlanna a hman tur Draft Electoral Roll chu tarchhuah a ni.

Serchhip District chhung Baktawng VC-ah hian Seat 5 awmin Seat khat chu Hmeichhe tana Seat hauh a ni a, VC inthlan hnuhnung bera he Seat luah tura thlan-tlin chuan eizawnna dang avanga a Seat a kalsan tak avangin a Seat ruak hnawhkhat tur hian State Election Commission chuan inthlanna neih turin ruahmanna a siam a, hemi inbuatsaihna atan hian kum January 1-a kum 18 tling chin te laa Electoral Roll thar siam tur atan nimin khan Draft Eelctoral Roll hi tharchhuah a ni ta a ni.

Nimin-a Draft Electoral Roll tarchhuahna hun Serchhip DC Meeting Hall-a neih ah hian Bawrhsap leh District Election Officer Nakuk Kumar chuan Mizo hmeichhia ten kawng tinreng ah fak tlakin hna an thawk a, sawrkar pisa-ah te, sumdawnna ah te, kuthnathawhna hmun tinreng ah hmuh theihin an awm a, ram rorelna peng tinah pawh hmun dang ang thova tha an thawh tam ve pawh a tul hle a ni, a ti a. Chuvang chuan  Baktawng VC Bye-Election ah pawh Party tin ten candidate tha tak neih tum vek tura chahin, “Kan hmeichhia te i chher hriam sauh sauh ang u,” tiin a chah a. Bye-Election hun tur hi State Election Commission in an la ruahman fel chiah lo nain reilote ah kan hriat thuai a beisei awm thu a sawi a ni.

He hunah hian Election Officer Lalngaih-awmi Ralte chuan Draft Roll tharchhuah atang hian hming thun, paih leh siamthat ngai te tan dilna hun nghal a nih thu leh tun thla ni 31 thleng hun hi hawngin August 8, 2022-ah Final Electoral Roll chu tharchhuah tur a ni tih a sawi bawk.

Draft Roll atanga a lan danin Baktawng VC huamchhungah hian Buhkangkawn Sub-Village a awm bawk a, Baktawng Vengpui-ah hian In 232 awmin Vote nei Mipa 508 leh Hmeichhia 527, an vaiin 1035 an awm bawk a ni.