Japanese Encephalitis natna inhrilhhriatna neih a ni

Tunhnaiah Japanese Encephalitis (JE) vei nia rinhlelh Thenzawl mi hmuhchhuah a nih avangin he natna chungchang inhrilhhriatna chu nizan hmasa khan Thenzawl Joint VC bultumin Thenzawl-a Vantawng Group YMA Run-ah neih a ni.
Japanese Encephalitis chungchang inhrilhhriatna leh inzirtirna hunah hian Thenzawl khawchhunga tlawmngai pawl leh VC bakah Community Health Centre (CHC)-a thawktute telin Aizawl-a State IDSP atangin State Nodal Officer Dr. Pachuau Lalmalsawma bakah Entomologist Lalfakzuala Pautu, State Microbiologist Yogesh Malvi te telin District IDSP atangin District Surveillance Officer Dr. Lalngaihawmi Chhangte leh DDM C. Lalmalsawmi te an tel bawk a. Japanese Encephalitis chungchanga mipuite hriat tur hrang hrang leh he natna darh theih dan leh inven dan tur te bakah hri kai finfiah lo awm palh thulha hmalak dan turte sawilan a ni a, zawhna leh chhanna hun hman a ni bawk.

He hmalakna hnuaiah hian nimin khan Japanese Encephalities (JE) pudarh theitu Thosi lo awm palh theih thu ah Thenzawl Tualvungi Veng-ah Thenzawl CHC Staff ten Thosi umbo beihpui thlakin tui tlin theihna hmun leh Thosi lo pian theihna hmun hrang hrangte damdawi hmanga tih thianghlim a ni.

Tarlan tawh angin tunhnai khan Thenzawl khuaa damlo pakhat chu enfiah a nih hnu ah Mizoram-a la awm ngai lo khawsik natna chi khat Japanese Encephalitis a kai nia rinhlelh chu ELISA (Antibody Test) hmanga hmuhchhuah a ni a, hei hi Confirmatory Test a nih loh avangin a CSF sample chu Test na rintlak zawk (Real Time-PCR) a test turin Lal Path Laboratory, Kolkata-ah thawn leh a ni a, July 20, 2022-ah he Sample Test result hi tihchhuah niin a Sample hi a Negative (JE virus not detected) avangin Japanese Encephalitis Confirmed Case anga pawm theih erawh a ni lo thung a ni.