Mizoram-ah COVID-19 enkawllai an la pung zel

Niminpiah khan Mizoram-ah COVID-19 hri kai mi 159 hmuh leh niin nimin khan hri kai mi 127 te enkawl dam an ni thung.

Niminpiah khan Mizoram-ah Sample 651 enfiah leh niin heng atang hian COVID-19 hri kai mi 159 hmuh an ni a, Sample enfiah atanga chhutin za zela 24.42 te chuan hri an kai a ni. Niminpiah a COVID-19 hri kai hmuh belh te hi Rapid Antigen Test hmanga Sample enfiah 646 atanga hmuh te vek an ni a, Lunglei District-ah 66, Aizawl District-ah 29, Mamit District-ah 15, Serchhip District-ah 13, Champhai District-ah 10, Saitual District-ah 8, Khawzawl District-ah 7, Siaha District-ah 4, Kolasib leh Lawngtlai District-ah 3 ve ve leh Hnahthial District-ah mi pakhat te an ni a. ZMC-a RT-PCR Laboratory-ah Sample 5 enfiah niin hri kai hmuh erawh an awm lo thung.

Nimin khan District 6 atangin COVID-19 hri kai enkawl dam mi 127 awm ve lehin heti hian Mizoram-a COVID-19 hri kai hmuh tawh chu 2,32,384 an ni a, an zinga 2,30,879 chu enkawl dam ni tawhin hri kai zinga za zela 99.35 te enkawl dam an ni tawh a, hri kai enkawllai mi 795 la awmin hri kai zingah mi 710 an boral tawh bawk a ni.