Thenzawl chawmna atana Vanva lui tui lakna enchhinna hlawhtling taka neih a ni

Thenzawl khaw chawmna tura Vanva lui tui pump-na tur enchhinna, Official Commission-na hun chu nimin khan PHE Department-a Engineer-in-Chief C. Lalremsiama hovin neih a ni a, Thenzawl khuaa Private Water Connection pekchhuah theih tawh rih loh pawh pekchhuah leh theih a nih tak thu he hunah hian puan a ni.
Thenzawl chawmna tura Vanva lui Tui lakna atana Tuikhuah atanga Tui dahkhawlna thlenga pump-na enchhinna puala Inkhawm ah hian PHE Engineer-in-Chief C. Lalremsiama chuan Thenzawl chu Mizoram-a khaw lian pawl tak a nih laiin mipuite hnena Tui in tur pek chungchang ah erawh Standard Level an la phak lo hle tih a sawi a, hemi avanga khawtlang hruaitute nen tang tlanga hma an lakpuina zarah Vanva Dam hmanga Thenzawl khaw chawmna tura tui lak commissioned theih a ni ta chu lawmawm a tih thu a sawi a ni. PHE Engineer-in-Chief chuan tun dinhmunah Thenzawl mipuite hnena Tui sem thin chu chawlhkar khat ah tum hnih emaw, tum khat emaw a ni thin tih sawiin, mipui ten an mamawh khawp tui an dawn thin loh avangin mipuite pawh an khawngaihthlak thin hle tih a sawi a. Tunah chuan Gravity hmanga tui an lakna chu Vanva Dam nen tangkawpin mipuite hnenah Tui sem a nih theih dawn thu leh Gravity hmanga Tui lakna pawh hlamchhiah lova chei thar zelin Thal tak takah pawh Tui harsa lutuk lova an awm theih a beisei thu a sawi bawk.


Vanva Dam Official Commission-na puala inkhawm hi PHE Serchhip WATSAN Division-a Sr. Executive Engineer Er. F. Lalsanglura chuan kaihruaiin Sr. SDO Er. Samuel LR. Ralte chuan Technical Report a pe a. Vanva Dam hi NABARD sum cheng nuai 511.96 senga siam niin hnathawh tur atanga za zela 80 vel thawh zawh a ni tawh a, kumin kumtawp lam Ber thla velah chuan hawn theih a beiseiawm tih a sawi bawk. Vanva Dam atang hian chawlhkar tin darkar 38 chhung tui pump theih tur niin darkar khat ah litre 45,000 pump theih a ni dawn a, mi pakhat tan ni khat ah tui litre 20 zel pek theihna tur niin mamawh dan a zirin hei aia tam pawh hi Tui pump thei tura ngaih a ni.

He hunah hian PHE Department a thawktute leh Thenzawl-a VC leh YMA hruaitute telin khawtlang aiawha thu sawitu Thenzawl Joint VC Vice Chairman Lalropuia Sailo chuan he tui lakna chungchang ah khawtlang a VC te an beidawn rum rum lai pawha PHE Department in theihtawp an chhuahpui avanga Thenzawl tana ni chhinchhiah tlak tak an thleng ta chu lawmawm a tih thu a sawi a. Tun aia changtlung leh tha zawk an neih zel theih nana hma lak pui tura Department te ngenin, an khua viltu tur SDO an mamawh thu leh hemi kawngah pawh theihtawp chhuaha hma lakpui turin a ngen bawk a ni.

Comments

Popular posts from this blog

Tukverh-a tlasual boral