COVID-19 hri kai enkawllai mi 708 la awm mek

Nimin tlai thleng khan Mizoram-ah COVID-19 hri kai enkawllai mi 708 la awmin District tinah hri kai enkawllai hi an la awm vek a ni.

Inrinni khan Mizoram-ah Sample 537 enfiah leh niin heng atang hian COVID-19 hri kai mi 120 hmuhchhuah niin Sample enfiah atanga chhutin za zela 22.35 te chuan hri an kai a, heng hri kai hmuhchhuah te hi Rapid Antigen Test hmanga hri kai hmuhchhuah te vek niin RT-PCR leh TrueNat Laboratory-ah Sample enfiah a awm lo a ni. Inrinni-a hri kai hmuhchhuah te hi Aizawl District-ah 51, Lunglei District-ah 39, Serchhip District-ah 8, Saitual District-ah 6, Champhai leh Khawzawl District-ah 5 ve ve, Mamit District-ah 3, Siaha District-ah pahnih leh Hnahthial District-ah mi pakhat te an ni.

Zirtawpni khan Mizoram-ah Sample 564 enfiah ni bawkin heng atang hian hri kai mi 147 hmuh an ni bawk a, an vai hian Rapid Antigen Test hmanga hri kai hmuh te vek niin Aizawl District-ah 63, Lunglei leh Mamit District-ah 20 ve ve, Saitual District-ah 13, Khawzawl District-ah 11, Serchhip District-ah 10, Kolasib District-ah 9 leh Hnahthial District-ah mi pakhat te an ni.

Zirtawpni khan Mizoram-ah COVID-19 hri kai enkawl dam mi 153 awmin Inrinni khan mi 122 enkawl dam an ni leh a, nimin khan hri kai mi 39 te enkawl dam ni lehin heti hian nimin tlai dar 5:00 thleng khan Mizoram-a COVID-19 hri kai hmuhchhuah tawh chu 2,31,678 niin an zinga 2,30,102 te chu enkawl dam an ni tawh a, hri kai hmuh te atanga chhutin za zela 99.32 enkawl dam ni tawhin enkawllai 868 an la awm a, hri kai zingah mi 708 an boral tawh a ni.