Pala Dil leh a chhehvel Ramsar Site-ah puang

Siaha District chunga Pala Dil leh a chhehvel (Pala Wetland) chu Ramsar Site-ah puan a ni tih Mizoram sawrkar-a Environment, Forests & Climate Change Department chuan thuchhuah siamin a tarlang.

Hemi chungchanga thuchhuah an siamah Environment, Forests & Climate Change Department chuan tunkar Thawhlehni, July 26, 2022 khan Pala Dil leh a chhehvel (Pala Wetland) chu India ram hmun danga Wetland pali (4) te nen khawvel puma Wetland pawimawh bik, Ramsar site-ah puan a ni tih tarlangin, hei hi thil chhinchhiah tlak bik leh Mizorama a vawikhatna a nih avangin ramngaw leh nungcha humhalhna kawngah rilru thar leh phurna thar min put tirtu a nih ngei beisei a ni tih an tarlang a ni.

Wetland tih hi hmun hnawng, tuiin a chim reng emaw, a chim fo thin tihna a ni a. Thing leh mau leh nungcha tinrengah an hausa in tuihna siam leh tih thianghlim kawngah an thawhhlawk hle thin. Mizoram hian hetianga hmun hnawng (wetland) hi kan nei nual a, tunah hian Wetland pahnih – Tam Dil leh Pala te hi State Board for Wildlife kaihhruaina hnuaiah a chhehvel mipui te nen tangho in Environment, Forests & Climate Change Department (EF&CC) chuan a enkawl mek a ni. Wetland hi a pawimawh em avangin EF&CC Department chuan a tam thei ang ber enkawl leh humhalh turin tan a la mek bawk.

Pala Wetland hi MADC huamchhung, Phura khaw bula awm a ni a, thing leh mau leh nungcha-ah a hausak mai bakah hmundanga hmuh tur awm zen zen tawh lo te pawh an awm avangin Sawrkar laipuia Ministry of Environment, Forests & Climate Change kaltlangin Ramsar Secretariat-ah ‘Ramsar site’ atan rawt a ni a, tehna hrang hranga an lo teh hnuah pawm a ni. Pala Dil hi tuipui zawl (sea level) atanga meter 274-a sang-a awm a ni a, Dil leh a chhehvel sq.km. 24 hi Reserved Forest niin Ramngaw, kum tluana hring reng (Semi-Evergreen Forest) in a hual vel a. Sava chi hrang hrang, bawkvak-a kal chi (reptiles) chi hrang hrang, nauban leh thing chi hrang hrang a tam bakah sava pem chi thenkhat ten an tlawh thin bawk a ni.