Latest News

MBSE Online Portal thar Minister in a hawng

Mizoram Board of School Education (MBSE) Online Portal chu nimin khan School Education Minister Lalchhandama Ralte chuan Aizawl-a MBSE Conference Hall-ah a hawng.

MBSE Online Portal hawnna hunah hian Education Minister Lalchhandama Ralte chuan khawvel thiamna leh hmasawnna in a ken tel 'MBSE Online Portal' hawn a ni chu lawmawm a tih thu sawiin, Zoram zirna hmasawnnan leh zirna kawnga tangkai zawk leh ram mipuite tana hna an thawh theihna turin he Online Portal hi hawn a ni tih a sawi a. Kan ramah zirna tha zawk hmasawnna rahbi chu NEP 2020 denchhenin chhawpchhuah mek a nih zel thu sawiin, School Education Department hnathawh langsar em em chu a nawlpuiin Covid kan hlauh zual laia MBSE thahnemngaihna avanga HSLC leh HSSLC Examination Conduct kha a ni tih a sawi a a hlawhtlin nana thawktu lo penchhuak zawng zawngte chungah lawmthu a sawi a. Mizoram a zirna quality ti changtlung tur leh a nihna tak phochhuak theia Offline Mode a exam buatsaih a nih chu thawhhona tha tak a awm vang a nih thu a sawi bawk a ni.

Nimin-a hawn tak MBSE online portal domain hi mbseonline.com a ni a, he portal kaltlang hian Students Registration chu MBSE Office a kal kher ngai tawh lovin School tinin online a registration ti tura zirlai bio data ngaite, an thlalak leh signature te thlengin an rawn upload thei tawh dawn a. Registration fee pawh hi online a pek theih vek tawh turin ruahmanna siamfel ani tawh a. Payment gateway atan PAYTM company nena inremna pawh ziahfel ani tawh a ni.

He Online Portal siam tur hian programmer te rawih niin funding hi Samagra Siksha lam atanga hmuh a ni a. MBSE Online Portal-ah hian High School 767 leh Higher Secondary School 214 te registered vek tawh niin, School hming, Address, School Code, Centre Code, an awmna District, affiliate an nih leh nih loh te, Centre School an nih leh nih loh te, an Centre te tar lan vek ni tawhin, Directorate of School Education atanga permission an neih leh neih loh te tarlan vek tawh a ni a, School tin tan hian statistics tam tak a lo vawngtha thei dawn a, awlsam te in mahni School data a en zung zung theih dawn a ni.

MBSE Online Portal-ah hian High School leh Higher Secondary School Examination form fill up leh fee pek te; Integrated Evaluation System (IES) Marks Submit Admit card issue te; Mizoram Teacher Eligibilty Test (MTET) form fill up leh fee pek t; D.El.Ed Registration leh Examination form fill up leh fee pek te; Affiliation form form fill up leh fee pek leh Publisher leh Textbook dealer fee pek te tih theih tura ruahmanna neih mek a ni bawk.

Comments

Popular News (Last 30 Days)