LBS Suzuki All Mizoram Inter-Village Tournament-ah Champhai Kanan VC an champion

Champhai Kanan VC Team chuan Sialhawk VC Team chu si hnih fai-a hnehin LBS Suzuki All Mizoram Inter-Village Tournament 2022 ah an champion ta.

Mizoram mipuite ngaihven hlawh LBS Suzuki All Mizoram Inter-Village Tournament 2022 hi nimin khan Aizawl Lammual-ah Final khelin zawhfel a ni a, Final hi Champhai Kanan VC leh Sialhawk VC Team ten khelin inkhelh tan atangin Champhai Kanan VC an chungnung in ball pawh an chang tam a, Sialhawk VC goal khung chu Offside vangin pawm a ni lo a, Team pahnih an fimkhurin chance hlauhawm pawh a awm meuh lo a, goal lut lovin hun chanve an hmang zo a ni.

Hun chanve hnu lamah pawh Champhai Kanan VC lam bawk chungnung lehin minute 60-na ah Counter attack atangin R. Ramdinthara chuan goal khungin hma an hruai a, hemi hnu hian Sialhawk lamin an si phurh sut tumin bei mah se Playmaker tha an neih loh a lang deuh niin a lang a, hun tawp dawnah Champhai Kanan VC lamin penalty hlawhchhuak lehin hei hi goal hmasa khungtu R. Ramdinthara bawkin goal-ah a chantir leh a, Sialhawk VC lamin an si phurh an sut theih tak loh avangin si hnih faiin Champhai Kanan VC Team in hnehna an chang a, LBS Suzuki All Mizoram Inter-Village Tournament 2022-ah an champion ta a ni.

Tun tum Tournament-a Champion Team Champhai Kanan hian Rs. 1,50,000 leh Trophy dawngin pahnihna Sialhawk in Rs. 1,00,000 leh Trophy an dawng a. Semi Final lut Team hnih ten Rs. 40,000 ve ve dawngin, Fair Play hi Sialhawk VC team-in dawngin pawisa fai Rs. 20,000 a tel a ni. He Tournament-ah hian Lalramsanga (Champhai Kanan VC) chu Best Player atana thlan niin Rs. 10,000 leh Trophy a dawng a, Goal 13 khungtu R. Ramdinthara (Champhai Kanan VC) chu Top Scorer niin Rs. 5000/- leh Trophy a dawng a, Match 7 an khelh atanga match 4 zet goal chhuah loh neitu Lengpui VC Team Goal keeper R. Lalhmangaihzuala chu Best Goal Keeper atan thlan niin Rs. 5000/- leh Trophy a dawng bawk a ni.

He Tournament hi June ni 24, 2022-a khelh tan kha niin match 203 khelin goal 908 a lut a, Champion ta Champhai Kanan hian Game 8 khelin goal 28 an khung a, goal 11 chhuahin, clean sheet vawi 3 an nei bawk a, Tournament khelh chhung hian Thenzawl East, Serchhip Joint VC, Melbuk, Thakthing, Vaivakawn leh Republic Veng te hneha Final lutin Final-ah pawh hnehna chang lehin an Champion zui ta a ni.