NEUM ten lungawiloh lantirna titawpin nimin atangin an hna an thawk chhunzawm ta

Sawrkar laka phut neia nuar leh sawrkar in insawifiah tura a tih National Health Mission (NHM) Employees Union Mizoram (NEUM) te chuan nimin khan an nawrna titawpin an hna pawh an thawk tan leh ta.
Nimin lama tarlan tawh angin tiamchin awm lova nuar NEUM te hi bân an nih lohna chhan tur ziaka insawifiah tura sawrkar in a hriattir hnuah nimin khan insawifiahna hi thehlut turin ruahmanna an siam a, amaherawh chu Central YMA Office Bearers te chuan NEUM te thilphut chungchangah hian Palai hna thawkin sawrkar an dawr a, he an indawrna te hi Pathianni zan dar 8:30 khan NEUM chuan Executive Committee neiin an ngaihtuah zui nghal a, Palaite thusawi atang hian Sawrkar hian NEUM te rawtna hi a pawmpui ah an ngai tih sawiin, Mizoram sawrkar in Health Department tana theihtawp an chhuah thin te hi hriatpui ve se an duh thu le, hamthatna an neih te pawh tih hlawhtlin sak thuai zel tura an ngen thu an sawi a. Strike an neih mek pawh nimin, July 18, 2022 (Thawhtanni) zing dar 9:00 atangin an titawp tih an sawi a, hemi ang hian hmun hrang hranga NHM Staff te pawhin nimin khan an hna hi dan pangngai in an thawk chhunzawm leh a ni.

NEUM thuchhuah in a tarlan danin Central YMA hruaitute hian sawrkar thuneitute an dawrna ah hian Study Group chungchang-ah Deputy Chief Minister Tawnluia dawrin chak taka hmalak a nih thu leh a chhuah hun chu sawi mai theih ni lovin September thla hma pawh a nih theih thu leh September thla hnu pawh a ni mai thei tih sawiin, a hma thei ang bera tihchhuah tum mek a ni tih thu a sawi a. An hlawh chungchang-ah Health Minister Dr. R. Lalthangliana dawrin regular taka hlawh pek an nih theih nan hma lak a nih thu leh tunah pawh hian June thla hlawh tur pawh peihfel ni tawhin regular taka an lak theih nan ruahmanna pawh siam mek a nih thu a sawi a ni.

MESMA Order puan khum tawh lo tura an phutna chungchangah Health Minister chuan Mizoram Essential Service Maintenance Act 1990 (as Ammended 1995) chu COVID-19 boruak anih vanga chhuak a nih thu leh NEUM Strike neih avanga Order hi chhuah a ni lo tih a sawi a, an nawrh hma atanga Covid rawn pung leh avanga tihchhuah tura file awmsa a ni tih pawh sawiin, he Act hi chu COVID-19 bik atana tihchhuah anih angin Notification pawh siamthat a ni ang tih a sawi niin NEUM thuchhuah chuan a tarlang a. NEUM te rawtna a tello ‘Show Cause Notice’ chungchang pawh Palai te hian sawiin, NEUM member ten nawrh an huaihawt hi an Call off anih chuan Show Cause Notification hi cancel nghal anih tur thu Deputy Chief Minister chuan a sawi niin an tarlang bawk a ni.