President thar atan Draupadi Murmu lakluh a ni

Draupadi Murmu chu India President 15-na atan nimin khan Parliament Central Hall-ah rinawmna thu tiam tira lakluh a ni.

President thar hi Chief Justice of India Justice N.V. Ramana chuan rinawmna thu tiamtirin a lalut a, he hunah hian Rajya Sabha Chairman M. Venkaiah Naidu, Prime Minister Narendra Modi, Lok Sabha Speaker Om Birla, Union Ministers, Governors, Chief Ministers, Heads of Diplomatic Missions, Members of Parliament leh Principal Civil leh Military Officers engemawzat bakah sawm bik te an tel a. Mizoram atang pawhin Lok Sabha MP C. Lalrosanga leh Rajya Sabha MP K. Vanlalvena te an tel a ni.

Lakluh a nih hnua thu a sawi ah President thar Draupadi Murmu-i chuan hmun kilkhawr tak atanga rethei taka lo chawrchhuak hmei-chhia, President a rawn ni thei chu mipui rorelna democracy mawina a ni, a ti a. Tuna a hlawh-tlinna chu mimal hlawhtlinna niloin ramchhung mi rethei zawng zawngte hlawhtlinna a nih thu a sawi a. Ramchhunga mi hnuaihnung leh rethei zawkte hmasawnna turin theihtawp a chhuah tur thu a sawiin, hmasawnna huapzo nei tur leh hmeichhiate dinhmun chawisang turin a thawk dawn tih a sawi bawk a ni.