Ujjwal Bharat - Ujjwal Bhavishya Power @2047 pualin Serchhip-ah ‘Kawlphetha Kut’ hman a ni

India ramin zalenna a hmuh champha kum za na, kum 2047-ah India ramin Power intodelh (independent) neih hman tuma hmalakna ‘Ujjwal Bharat - Ujjwal Bhavishya Power@2047’ chungchang inhrilhhriatna hun ‘Kawlphetha Kutpui’ chu nimin khan Serchhip P&E Veng YMA Hall-ah District Bawrhsap Nazuk Kumar IAS hovin hman a ni.

‘Ujjwal Bharat - Ujjwal Bhavishya Power@2047’ pual inkhawm neih ah hian District Bawrhsap Nazuk Kumar chuan ‘Ujjwall Bharat - Ujjwall Bhavishya’ awmzia chu ‘Mamawh khawp kawlphetha neih a, hmakhaw duhawm tak neih’ tihna a ni ber tih sawiin, kan nitin nunah, zirna ah te, hriselna lam leh Hospital-ah te leh kawng tinrengah kawlphetha hnianghnar kan mamawh a, Mizoram pawh tlangram anih avangin tuilakna leh a semdarhna kawng thlengin kawlphetha hnianghnar kan mamawh tih a sawi a. Chu kan mamawhna phuhruka kan mamawh khawp kawlphetha kan neih theih nan sawrkar laipui chuan hmalakna ropui tak a kalpui ta a ni, tiin kan ram in he ruahmanna a mamawh dan a sawi a. Mitinin kawlphetha hnianghnar kan neih theih nana a semdarhna leh a inthlunkhawmna tha kan mamawh dante pawh tarlangin, sawrkarin ruahmanna a duan tlangpui a tarlang bawk.

Bawrhsap chuan Power renchem thiam hi a pawimawh em em tih mipuiten kan hriat reng a pawimawh thu sawiin, “Kan hman tangkai loh lai chuan kan Bulb te off zel ila, midangten chu chu an lo hmang tangkai thei a ni. Tuna kan neihsa pawh hi renchem zawka mipuiten kan hman thiam chuan dinhmun tha zawkah kan ram hi a ding thei a ni,” tiin mipuite chu kawlphetha renchem turin a chah a. Power Grid Corporation of India Limited in Serchhip District Hospital sakna tur sum tam tham tak CSR atanga min pek avangin lawmthu a sawi thar leh bawk a ni.


Nimin-a ‘Kawlphetha Kut’ hmanna ah hian P&E Serchhip Division-a Sr. EE leh District Nodal Officer Er. Laltlanthanga chuan he Kut an hmanchhan leh a thiltumte sawifiahna a nei a. Sawrkar laipui chuan India ramin zalenna a hmuh champha phak kum 100-na ah chuan rorelna ah mai nilova kawlphetha siamchhuahna lamah pawh mahnia intodelh famkim ram anih theih nan ruahmanna a siam a. He hmalakna tihpuitlin kawngah hian ram mipuite an pawimawh a, mawh-phurhna tam tak kan neih avangin chu kan mawhphurhna inhrilhhriat nan he hun hi buatsaih a ni, tiin ‘Ujjwall Bharat - Ujjwal Bahvishya Power @2047’ kalpui a nih chhan tlangpui a tarlang a. He hmalakna kalpui chhoh dan tura sawrkar ruahmanna tlangpui pawh a sawifiah bawk.

Nimin-a he hun hmanna ah hian chhungtin ten kawlphetha khamkhawp an neih theih nana rampum huapa sawrkar hmalakna chanchinte, thing-tlang electric la nei ngai lote Electric pawhluh sak an nih dante, kawlphetha semdarh dan tha kalpui mek te, Ni eng chakna hmanga kawlphetha tam zawk siam a pawimawhna te leh Consumer te chanvo inhrilhhriatna Video thlirho a nih bakah New Serchhip SAY ten hemi kaihhnawih inzirtirna lemchan an entir a. Sawrkar laipui ruahmanna anga a thlawna kawlphetha pek dawngtu mi pathum te hnen atangin thusawi ngaihthlak a ni bawk.

India ram zalenna champha vawi 75-na chu hapta kar 75 chhung lawm mek a ni a. He Mahotsav lawmna peng pakhat atan Ministry of Power chuan ‘India Eng Hma lam Hun Eng’ (Ujwal Bharat, Ujwal Bhavishya) tih thupui hmangin India ram District tinah buatsaih niin Power lama Sawrkar hmathlir thui tak, kum 2047 thlenga hmasawnna tur ruangam ruahmanna te puanchhuah a ni. He Programme hi India ram District 773-ah hman mek niin Grand Finale-ah hian Prime Minister in India hmathlir tlangzarhna a nei dawn a, Serchhip District-ah chuan Vawiin hian Thenzawl-ah hun hman leh tur a ni ang.

Comments

Popular posts from this blog

Tukverh-a tlasual boral