Serchhip District Sports Committee hnuaia Association ten DSC ruangam thar tur an duh lo

Serchhip District Sports Committee (SDSC) hnuaia Sports Association hrang hrangte chuan Mizoram sawrkar in District Sports Committee ruangam a siam thar chu an duh lo tih sawiin, hemi chungchanga DC lamin thutkhawm an koh pawhin tel rihloh nise an ti.

Serchhip District Sports Committee (SDSC) hian nimin tlai khan Serchhip P&E Rest House, Bukpui-ah Special General Body Meeting neiin Mizoram sawrkar in tunhnaia District Sports Committee ruangam a siam thar, Gazette-a a tihchhuah tak chungchang hi an sawiho a, he hunah hian sawrkar ruahmanna thar siam hi inhrilhfiah niin District Sports Committee hnuaia Association hrang hrangte chuan an pawl ngaihdan te an tarlang bawk a, SDSC hnuaia Sports Association 20 atanga Association 17 tel ten an ngaihdan an sawiho hnuah sawrkar in District Sports Committee ruangam a siam thar chu an duh loh thu Resolution siamin an pass a ni.


Nimin-a SDSC Special General Body Meeting hi SDSC Chairman K. Tlangthanmawia chuan kaihruaiin sawrkar in District Sports Committee ruangam a siam thar an duh loh thu hi Chief Minister leh Sports Minister bakah State Sports Council-ah pawh a copy hi pek nise an ti a. District Sports Committee chuangchang ah hian DC lam atangin thutkhawm kohna a awm a nih pawhin thu leh a awm hma chuan Association hrang hrangte tel rih loh nise an ti bawk a ni.

Tarlan tawh angin Mizoram sawrkar chuan ‘The Mizoram Sports Council (Formation and Functioning of District Sports Committee) Regulation 2022’ chu tunhnai khan a siam thar a, hetah hian District tina Deputy Commissioner te chu District Sports Committee-ah hian Chairman-ah dah niin District Sports & Youth Officer (DSYO) te chu Secretary an ni dawn a, Sr. Vice Chairman leh Vice Chairman bakah Asst. Secretary te chu District Sports Committee hnuaia Sports Association atanga thlan tur an ni dawn a, MSSC in Fin. Secretary ruatin Treasurer erawh an awm dawn lo a, hei bakah hian Member-ah pawh Sports Association aiawh bakah sawrkar Official leh mi dang ruat belh theihna te dah a ni.

Hetianga District Bawrhsap te kaih-hruaina hnuaia District Sports Committee kalpui hi hun engemaw chen Mizoram-ah kalpui a lo nih tawh hnuah sawrkar chuan tidanglamin Sports Association tin aiawh kalkhawm ten an thlan Chairman kaihhruaina hnuaiah kalpui leh a ni a. Hei pawh hi hun engemaw chen kalpui leh a nih hnuah tunah hian sawrkar chuan tidanglam turin ruahmanna a siam leh a. Hei hi District hrang hranga Sports Committee chuan duh lovin nikum lam atang khan hma an lo la tawh a ni.

Comments

Popular posts from this blog

Tukverh-a tlasual boral