Serchhip District Road Protection Squad ten a thawh hnihna atan Serchhip khawpui an fang leh
Tun thla ni 1-a Serchhip District Level Road Protection Squad thukhawm in a lo rel tawh angin Serchhip District Road Protection Squad te hian nimin khan an Chairman leh Bawrhsap mawhphurhna la mektu Lalmuansanga Ralte MCS, hovin Serchhip khawchhung kawngpuite endik hna an thawk tan leh a, he hunah hian Lalmuansanga Ralte chuan, kan khua in hma a sawna, a lo mawi a, a lo felfai zawk theih nan kawngkam-a cheng chhung tinte kan pawimawh tih sawiin, Vantlang mamawh kan inkalpawhna kawngpuite venhim a nih zel theih nan theihtawp chhuah tlang turin mipuite a sawm a. Chhungtin in kawngpui hnaih kan duh theuh thu leh kan mamawh thu sawiin, amaherawh chu kan mamawh em em kawngpui hi mahni nawmsakna leh awlsamna zawn luatah kan lo nek riral ve thei bawk tih a sawi a, “Kan tu leh fate pawhin a la rawn rin zui ve zel tur thil pawimawh hi i venghim ang u,” tia mipuite sawmin a bultantu nih tum theuh turin a sawm bawk a ni.
Serchhip District Road Protection Squad te hian Nov. 5, 2020 khan Serchhip khawpui chhung Veng hrang hrangte tlawhin Vantlang kawngpui dip-a bungrua leh thildang dah an awm leh awm loh te enfiahin hma an lo la tawh a, an hmalakna te hi February 10, 2021 khan thlirletna neiin hmalak zuina tur hrang hrangte pawh duan a ni a. Amaherawh chu hripui leng in a zui tak avanga hun engemaw chen mumal taka hmalakna neih theih a nih loh hnuah kumin July 1 khan Serchhip District Road Protection Squad hian thutkhawm nei lehin heng an hmalakna te hi a theih anga chhunzawm leh an rel a, hemi ang hian nimin khan a thawh khatna atan District Road Protection Squad te hian khawpui fan hna hi thawkin he hunah hian District Road Protection Squad member te an thawkchhuak tha hle a ni.
Nimin-a District Road Protection Squad fehchhuak te hian IOC Veng atanga bul tanin Bilzel Veng an enfiah hnuah Serchhip Field Road atanga tan lehin Field Veng VC huamchhung chin te an tlawhkual a, khawpui thang zelah kawngpui awm ang ang te lirthei tan leh ke-a kal te tana a him theihna turin Serchhip khawpui chhunga kawngte hi a him tawk em? Vantlang tana hnawk tham-a kawngpui nek an awm em? Kawng kama dawr leh Workshop neiten kawng an nek nasa lutuk em? Lirthei neitu kawngpui kam-a lirthei dah nghet tlat thin an awm em? tihte chipchiar taka en a ni a. Heng an kalna ah hian chutiang mi an hmuh apiangte chu insingsa tura hrilhin lehkha in an umzui leh dawn a, an hun bituk chhunga an lo insingsa fel lo a nih chuan hmalak zui tur niin In sak leh thildang avanga kawngpui kam-a bungraw dah ngai te chu UD&PA Department-a phalna la turin an hriattir nghal bawk a. Nimin-a Veng an tlawh bak te pawh hi a tahtawl in tlawh chhunzawm zel tura ruahman a ni bawk.
Comments
Post a Comment