Bawrhsap hovin National Viral Hepatitis Control Programme leh BMWM Committee thutkhawm neih a ni

Nimin khan Serchhip District Bawrhsap Nazuk Kumar IAS hovin ‘National Viral Hepatitis Control Programme’ chungchangah District Level Meeting neih niin ‘District Level Bio-Medical Waste Management Committee’ thutkhawm neih a ni bawk a, Serchhip Sailiamkawn-a Incinerator bun tawh chu hman a nih theih nana hmalak tum a ni.

Nimin a thutkhawm hi Serchhip DC Meeting Hall-ah neih niin National Viral Hepatitis Control Programme chungchang thutkhawm neih hmasak a ni a, he hunah hian National Viral Hepatitis Control Programme-a District Nodal Officer Dr. K. Lallawmzuala chuan Powerpoint Presentation hmangin he hmalakna hnuaia ruahmanna siam hrang hrangte a lem nen a tarlang a. Serchhip District-a Hepatitis B leh Hepatitis C dinhmun te tarlangin, Mass Screening tih theih dan tur leh Viral Load Test theih dan tur te sawiho a ni a. Serchhip CMO Office leh Blood Bank bakah District AIDS Control Programme hnuaia ART Centre leh OST Centre lama Medical Officers te nen tangkawpa hmalak dan tur chipchiar zawka ruahman nise tih a ni.


Hemi hnu hian District Level Bio-Medical Waste Management Committee thutkhawm chu Bawrhsap kaihhruaina hnuaiah neih zui nghal a ni a, he hunah hian Serchhip CMO, DMS, District Surveillance Officer (DSO) leh UD&PA leh VC aiawh te bakah MHSSP-a District Quality Manager te an tel a, Serchhip District-a damdawi In leh Health Care Centre hrang hranga bawlhhlawh paih dan te chu Bio-Medical Waste Management-2016 Guidelines anga kalpui vek tawh a nih thu tarlan a ni a, chutih rual chuan Common Treatment Facility District a awm loh thu tarlan niin hmalak dan ngaihtuah nise an ti a ni.

He thutkhawm ah hian Serchhip Sailiamkawn-a damdawi In bawlhhlawh te tihralna tur hmun leh khawl (Incinerator) bun tawh chu Electric Transformer a awm loh avanga hman theih a nih loh thu tarlan a ni a, hemi chungchanga hmalak pawh hi rel niin Serchhip District Hospital hnawmhnawk te chu UD&PA Department ten an paih ve theih nana ngen te an rel bawk a ni.

Comments

Popular posts from this blog

Tukverh-a tlasual boral