Serchhip-a Treasury in chawlhkar khat chhung sum pechhuak tawh lovin hlawh pek hun tur an la hre lo

Serchhip-a District Treasury Office chuan chawlhkar khat chhung sum an pekchhuah tawh loh thu sawiin, sawrkar hnathawk te hlawh an pekchhuah theih hun tur an la hriat loh thu an sawi a, hotu sang atanga thuchhuah awm ang ang bawhzui nghal thei turin inring renga an awm thu an sawi.

Tunhnaia Mizoram Treasury hrang hrang ten sum an pekchhuah theih loh chungchang ah Serchhip-a District Treasury Officer R. Lalhmachhuana MFAS chuan kar hmasa Zirtawpni, July 22, 2022 chawhnu lam atang khan sum hi pechhuak tawh rih lo tura an tih anga sum an pekchhuah tawh loh thu nimin khan LENKAWL a hrilh a. Mizoram-a Treasury hrang hrang ten sum an pekchhuah theih dan hi a inan loh thu leh Serchhip Treasury hian ni khat-ah cheng nuai 40 thleng an pekchhuah thin laiin hun engemaw chen kalta atang khan cheng nuai 20 an pekchhuah theih tak thu leh hei hi tuna an dinhmun mek a ni tih a sawi a. Zirtawpni kalta chawhnu lam atang khan sum pechhuak tawh lo tura an tih avangin chawlhkar khat chhung chu sum reng reng an pekchhuah tak loh thu leh hnathawk tur erawh chuan nitin thawktute an kal thu a sawi bawk.

Serchhip-a Treasury Officer chuan he sum an pekchhuah theih cheng nuai 20-ah hian sawrkar hnathawk te hlawh leh Pension erawh a tel lo tih pawh sawiin, thla khat chhunga sawrkar Pisa kai ni hnuhnung ber, July 2022-ah chuan nimin ang kha sawrkar hnathawk te hlawh an pekchhuah tan thin hun a ni tih a sawi a, tun tum ah chuan hlawh pekchhuah an la neih loh thu leh Aizawl lama hotu sang ten pechhuak tura an tih hun apianga buaipui tur chuan an inring reng tih a sawi bawk.

Mizoram Treasury lian ber Aizawl South Treasury Officer, Dr. K. Lalnghinglova chuan, Department te hnena CSS sum pekchhuah a nih hnuah Mizoram sum dinhmun a la ziaawm thei rih lo tih sawiin, Department hrang hrang atangin Sawrkar hnathawk hlawh tur leh Bill chi hrang hrang an dawn reng thu leh sum erawh an la pechhuak thei rih lo chhunzawm zel tih a sawi a, Treasury-te chu Finance Department lam atanga thu an hmuh ang anga an kal rih avangin engtikah nge sum hi pekchhuah theih a nih dawn an la hre thei bik rih lo tih a sawi bawk.

Comments

Popular posts from this blog

Tukverh-a tlasual boral